A pesar cu na comienso di siman Eddy Bennet di partido PPA a nenga cu e partido lo haya otro direccion of dirigente, tin indicacion cu esaki no ta cuadra completamente. Awe mainta a circula algun imagen di un of mas bus di e compania De Palm Tours cu ta hayando un transformacion completo cu imagennan di PPA.
Riba e bus por mira un logo nobo di PPA hunto cu un imagen fresco dunando indicacion di un ‘rebranding’ completo.
Esaki ta duna tur indicacion cu e rumor lo ta corecto cu Lisette Malmberg, kende ta propietario di e compania De Palm Tours, lo join e partido PPA di un forma of otro. Malmberg su intencion tabata pa participa den e proximo eleccion cu su propio partido ‘Transforma’. A registra Transforma oficialmente na Camara di Comercio dia 31 di maart 2021. Esaki tabata algun dia despues cu e registracion di partido politico a cera. Esey kiermen cu e partido aki no lo por participa riba su mes den e proximo eleccion dia 25 di juni 2021.
PPA a manda un invitacion pa prensa di Aruba pa ta presente diahuebs awo pa asina nan presenta nan plannan pa e proximo eleccion. Mirando e trabounan intensivo cu ta tumando lugar pa loke ta e ‘rebranding’ riba bus di De Palm Tours ta bisa hopi.
Nos lo keda pendiente pa e anuncio oficial pa mira kico e futuro di PPA y Transforma lo nifica den e proximo eleccion.
