Den cuadro cu e celebracion di Wit Gele Kruis, POH ta forma parti di e organisacion, for di 2012 caba. Segun Yazmira Croes-Mora, coordinadora POH (Praktijkondersteuners Huisartsenzorg), mientras tanto nan ta bay cumpli 7 aña como un parti preventivo den e eerste lijn.
E parti di prevencion ta en berdad algo hopi importante. Mester cuminsa na educa e pueblo tocante di e comemento saludabel y tambe e movecion. Esey ta parti di trabao di POH. Hopi di e malesanan cronico entre otro sucu halto y presion halto, colesterol halto, ta malesanan cu na prome instante por wordo evita. Si bo come saludabel, move y hiba un estilo di bida salud, por ta bo por haya sucu, pero na un edad hopi mas avansa.
Esey ta nifica tambe e ora ey, cu e complicacionnan ta bin mas despues. Un hende por biba un bida mas saludabel.
Estilo di bida
Segun Croes-Mora, fruta y berdura no ta hinca den e canasta basico. Ta cosnan hopi importante cu por ta por wordo hinca den e canasta basico. Ta cosnan esencial cu pueblo mester di dje. Tambe pueblo awendia por yega na un solucion door di purba na biba un bida mas saludabel. Como un mama soltero semper por traha. Por ehempel ta bay core riba Linear Park cu e yiu, of ta bay gym cu e yiu. Tin hopi manera cu hende por ta creativo y saludabel na e mesun momento. Prepara cuminda di delanta. Si den bo dianan liber bo prepara nan delanta, ta manera tipsnan cu POH tambe ta duna pashentnan.
Trabao di POH ta pa bisa nan come y biba saludabel. Pero no ta ey so. Ta duna nan tips tambe con pa haci’e. E tipsnan aki ta individual. Naturalmente cada persona ta diferente. Cada situacion di un persona ta diferente. Ta purba di enfoca riba e parti aki.
Programanan na television
Ta bay cuminsa tambe cu un serie di programa di television y esaki tambe ta pa concientisa pueblo pa bishita nan POH mas pa duna nan tambe e experiencia di algun pashent cu a yuda con nan bida a cambia. Esta nan a bira mas saludabel y con esey a mehora nan tambe den nan malesa.
E programa ta bay ta uno hopi interesante cu ta bay tin tanto pashent, ta bay entrevista tambe algun hende conoci den comunidad, cu tambe tabata pashent di POH. Asina eynan e programa di television ta bay duna mas informacion encuanto e trabao cu POH ta haciendo.
