Tur piscado ta keda cordialmente invita pa e reunion di capitan diabierna awor 16 di maart 2018 na Centro di Pesca Spaans Lagoen pa 7’or di anochi.
Aki lo repasa e reglanan te den detaye y inscribi pa e torneo di pesca tradicional di Dia di Himno y Bandera unda ta determina e rey di djampou di Aruba. E torneo mes ta tuma lugar diadomingo 18 di maart unda lo sali for di 4’or di marduga, bolbiendo tera pa 4’or di atardi.
Hopi premio:
E torneo e aña aki ta conta cu mas premio cu nunca. E comision organisador a bati na hopi porta pa logra hopi sponsor pa asina piscadonan por ta sigur di conta cu premionan atractivo. Ademas di mas di 2500 florin na premionan pa maximo kilahe y mayor ehemplar, lo tin hopi premio di consuelo. Aña pasa tur boto cu a cumpli a logra haña algo.
Gana un pasashi cu weekend stay pa Corsou:
Un premio special e biaha aki lo keda rifa entre e participantenan cu cumpli cu reglanan. Lo tin un pasashi ida y buelta pa Corsou incluyendo un weekend stay pa e feliz ganador. Pa cualifica pa e rifa aki, e piscado mester ta inscribi y cumpli cu e reglanan stipula. Tur esaki lo keda repasa durante di e captain’s meeting di diabierna.
Reunion di capitan
Diabierna awor, cuminsando pa 7’or di anochi na Centro di Pesca Spaans Lagoen, lo reuni y repasa regla y despues e reunion di capitan lo tin inscripcion oficial cual ta 35 florin pa persona. Mas cu claro Hadicurari su acostumbrado hospitalidad tambe lo tey presente y ta un bon oportunidad pa intercambia entre coleganan piscado.
