Despues cu siman pasa Aruba Lawn Tennis Bond tabata tin e tenista Patrick Sydow den dos torneo tanto na El Salvador y Costa Rica pa cu su clasificiacion pa e Weganan Olimpico Hubenil Burnos Aires 2018, awo ta un otro delegacion di tennis lo tin nan compromiso den exterior, e biaha aki na Guatemala e dianan 12 pa 17 maart venidero. Un total di 17 pais a confirma nan participacion den e torneo aki.
E seleccion masculino U14 di Aruba ta consisti di e atletanan, Abhay Daswani, Noah Muyale y Gijs Fidler, y lo wordo acompaña pa coach Humphrey Hosé. Mester bisa cu nos hobennan a prepara nan mes bon pa e torneo aki, nan a entrena duro y ta spera cu lo por logra un resultado satisfactorio pa nan mes y pa Aruba. Ya nan tin un tiki experencia internacional cual lo ta un ayudo sigur. E hungadornan Abhay y Noah a participa aña pasa tambe den JTC, mientras cu Gijs a hunga varios torneo di USTA y Little Mo na Merca. Un palabra di exito na e team di tennis di Aruba esta Abhay, Noah, Gijs y coach Humphrey.
Stichting Sportsubsidie Aruba ta subsidia e competencia e biahe di e delegacion di tennis pa e ITF Junior Team Compitition na Guatemala.
Cumprando weganan di Lotto, e Loteria di Aruba manera Catochi, 1-Off, Big 4, Zodiac, Wega di Number Korsou, Lotto di Dia, Lotto 5, Mini Mega cu su Mega Plus y e diferente weganan di Raspa Y Gana bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.
