Diamars merdia pa atardi Aruba a hay’e confronta un biaha mas cu un torencial awasero y lamper tabata corta bastante acompaña pa strena. Departamento di Agricultura, Cria y Pesca Santa Rosa a percura pa haci un inspeccion na e damnan y mira si a colecta awa y nan situacion. Esaki sigur ta percura pa tin un miho bista y tambe registra tur e damnan cu kisas por a yena ful of otronan cu ainda tin mas espacio pa colecta awa.
Ta papiando aki di damnan cu ta keda mas parti den Santa Cruz. Cuminsando na e dam di Sabanilla Abao, Cas Ariba, dam di Rooi Bosal patras di Stadion di Nadi Croes y Chrismo Angela, dam di Sabina cu ta keda banda di veld di Trappers, dam di Sabana Grandi, dam di Desha cu ta keda patras di Kenro Jewlers, Dam di Pal’i Bonchi patras di Wen Kee, Dam di Piedra Plat, dam di Cheta na Paradera, Tanki Leendert, dam di Tanki Flip.
Mayoria di damnan aki a colecta basta awa un mas cu otro pero ainda tin luga pa hopi mas y algun ful yen manera esun di Rooi Afo. Manera nos ta bisa semper mas awa yobe, mas largo nos productornan local por probecha di e awa aki. Sea nan mes por bay coy e awa na e dam cu ta mas cerca pa nan of kisas ta haci uzo di e servicio di truck di Santa Rosa cu ta haci entrega di awa.
Awa di dam cu hopi sushi
Departamento di Agricultura, Cria y Pesca Santa Rosa ta keda haci apelacion manera cu a bin ta haci pa varios aña pa no tira sushi den e damnan. Un biaha mas por a tuma nota cu hopi ta e sushinan cu a bin via di rooinan y termina den e dam. E sushinan aki por causa hopi problema cu dado momento tin kimico of otro productonan dañino y asina contamina e awa. Por a observa hopi boter di plastic y otro obhetonan cu no mester ta den e dam ta yega hunto cu e awa. P’esey nos ta haci un apelacion pa no tira sushi ni den dam y mucho menos tampoco den e rooinan paso na momento cu tin un awasero torencial esaki ta bin cu tur sushi cu ta termina den damnan rond Aruba. Esaki tampoco ta deseabel. Esaki ta keda un apelacion aña den aña afo y toch hendenan ta keda haci esaki.
Santa Rosa a tuma nota tambe cu varios rooi cu sushinan ta keda acumula y esaki tambe ta causa problema na momento cu e awa pasa via di e rioolnan y plug esaki cu sushi. Na momento cu e pasada tapa cu sushi, e awa por tuma un otro rumbo y ta trece problema pa luganan cu ta cuminsa yena cu awa. Kiermen mester tene bon na cuenta na momento cu kier bay tira sushi den mondi of den rooi. Esaki ta totalmente prohibi. E unico luga oficial y legal pa tira sushi ta na dump, ningun otro caminda mas.
Di parti di Santa Rosa ta sigui cu nan servicio di entrega di awa awor cu tin suficiente awa pa un periodo mas largo ainda pa productornan local por sigui produci cumindanan fresco. Ban haci bon uzo di e awa y sigur consciente pa bo matanan no mester haya mas awa di locual no mester.
