Djaweps 25 yanüari 2018, alrededor di 03.25 or un patruya polisial ku tabata patruya den e área di Saliña a tende zonido di tiramentu ku probablemente ta prosedente di un arma di kandela. Mesora e patruya a aktivá i a bai den e direkshon for di kua nan tabata tende e zonido.
Na yegada di e promé patruya polisial nan a bin topa ku un hòmber drumí abou riba Fokkerweg na altura di un negoshi. E hòmber aki a deklará ku e la keda alkansá pa un bala.
Mas aleu e agentenan polisial a nota un herida na un pia di e hòmber aki nasé na Kòrsou, 42 aña di edat ku tabata sangra bastante. Mas lat ambulans a transportá e hòmber aki pa poliklínika di SEHOS pa tratamentu médiko.
Kontinuando ku e investigashon na e sitio, polis a nota un korementu i gritamentu den e área kaminda tin un sentro di dibertishon. Ora polis a bai na e sitio, nan a mira un hòmber drumi abou banda di un outo blanku. E hòmber aki no tabata duna señal di bida. Te kaminda esaki tabata posibel i bou di e sirkunstansianan presente, por a mira herida di bala na e parti ariba di e hòmber aki, Jeangianno Jonathan Alegandro Zimmerman, nasé na Kòrsou, 18 ougùstus 1994 su kurpa. Alrededor di 04.15 or dòkter di polis a konstatá morto di e hòmber aki. Mas aleu a tuma nota ku e vehíkulo kaminda e hòmber aki tabata drumí tin perforashon di bala i glas destruí mientras riba kaya tin un kantidat di huls. Riba òrdu di Fiskal di Ministerio Públiko a konfiská e kurpa sin bida di e víktima pa mas investigashon.
Na e sitio polis a konfiská un kantidat di huls ku a haña den e área i algun vehíkulo, pa mas investigashon.
For di un investigashon preliminar ku polis a realisá na e sitio a resultá ku a surgi un tiramentu ku e resultado ariba menshoná, pa un motibu ku te na e momento aki ta deskonosí i ta den investigashon.
Na momento ku polisnan tabata investigá na e sitio, a drenta informashon ku na Poliklínika di SEHOS un hòmber di a yega den un vehíkulo privá i e hòmber aki tabatin un herida na su lomba.
Alrededor di 05.50 or polis a detené e sospechoso/víktima aki, C.B., nasé na Kòrsou, 27 aña di edat na SEHOS mes despues di tratamentu médiko. E herida no ta di gravedat.
A presentá e sospechoso C.B. dilanti di un Fiskal Ouksiliar ku a òrdená su enkarselashon pa mas investigashon.
E investigashon den e kaso aki ta kontinuá.
Nos ta supliká kualke persona ku ta disponé di informashon ku por yuda den solushon di e kaso aki pa duna polis e informashon aki na telefòn 917(24 ora pa dia) òf 108(number anonimo, kaminda bo anonimidat ta garantisá)
