A tuma nota di diferente cambio cu ta tumando luga na Imsan. Hopi biaha tin e impresion cu cobertura di cuido medico ta den man di AZV pa paga e gastonan. A mira cu tin trabaonan andando, trabaonan grandi cu ta bay cuminsa. Inversion di 61 miyon tey caba. Anki Ringeling, director di AZV a splica cu tin preparacionnan andando pa amplia e oferta di cuido medico cu Imsan ta ofreciendo y basicamente esey ta wordo financia via e fondo di AZV. E envolvimento di AZV ta hunto cu Imsan. Ta wak si tin un business case pa e ampliacion ey. Ta papiando specialmente di introduci Radioterapia na Aruba y tambe pa amplia e facilidadnan di e cambernan di operacion. Imsan lo bay haya camber di operacion pa locual ta bisa dagopname. Es decir cu hende no ta keda drumi eynan despues di un operacion. Nan ta keda descansa of pa observacion pa algun ora y e ora nan ta bay cas. No ta bay ta operacionnan cu ta hopi complica.
E radioterapia eynan mester pensa cu awor aki, e grupo di pashent cu ta wordo manda afo, gran parti di nan ta pashentnan cu ta bay specialmente pa Colombia pa radioterapia. A base di un business case a haci comparacion di e gastonan cu tin awor aki, mandando e pashentnan Colombia y cuanto e lo costa si akinan mes na Aruba tin e posibilidad pa duna e radioterapia.
Ringeling a sigui bisa cu si mira e placa cu ta costa AZV pa haci’e na Aruba, ta un poco mas caro, pero mester bisa si, e tin su bentaha si. Es decir, por ehempel e pashent ta keda den su propio ambiente, na cas na manera di bisa. Hasta por ta asina cu e pashent por keda traha podise. E guia, e acompañante cu ta bay Colombia cu e pashent, tambe ta na Aruba. No tin mester un guia, e famia mas cerca. Nan por bishita e pashent of vang op e pashent. Tur esey, menos AO, pa e pashent un ambiente mas positivo pa e por haya su radioterapia y purba di cura tambe. Tur esey ta bentahanan cu a bisa cu ok, si e ta costa un poco mas, specialmente na comienso di e proyecto, e no ta problema.
Na e mesun momento ta purba tambe di haya pashent for di otro islanan, manera Boneiro y St. Maarten specialmente. No ta menciona Corsou, pasobra nan mes tin nan facilidad di radioterapia.
Mas pashent ta wordo yuda na Aruba, mas abao e gastonan ta, pa pashent. E ta asina tambe cu pa tipo di cuido asina, cu ta cuido toch basta sofistica, e ta hopi importante pa e dokternan concerni, dokternan cu ta duna e terapia, dokternan cu ta trata e pashentnan aki, tin suficiente pashent, pa nan keda up to date cu nan conocemento, nan habilidadnan, pa por duna e cuido aki na un manera adecua.
Un otro aspecto cu ta wordo investiga, cu ta relaciona cu e radioterapia, pa cera un aliansa strategico cu un centro internacional. Den e caso aki muy probablemente e ta bay ta Baptist. Ya caba Baptist pa un paar di aña ta yudando Imsan pa setup diferente facilidad y e idea ta cu hopi di e islanan Caribense ya caba ta mandando pashent pa Baptist. E ta asina tambe cu siguramente na Miami y vecindario, ta un hospital hopi conoci, hopi renombra y podise por atrae pashentnan, den cooperacion cu Baptist, cu lo ta dispuesto pa haci nan radioterapia na Aruba, cu por ta un ambiente un tiki mas relaha, compara cu un ciudad grandi manera Miami.
Tur esey ta wordo studia y discuti pa asina por tin e facilidad di radioterapia aki na Aruba, pa asina evita cu tin cu manda pashentnan den exterior.
