Den luna di september, na diferente parti di mundo ta para keto riba e tema di Suicidio, por ehempel pa medio di plataformanan manera World Suicide Prevention Day riba 10 di September, y otronan cu ta tuma henter e luna pa conscientisa riba e tema aki.
Nathalie Kingsale, psychiater di Respaldo ta splica cu e tema di suicidio ta uno pecularia pasobra ora cu un hende comete suicidio, normalmente Respaldo no ta wak’e ni tampoco Hospital. Ta yama Polis ora haya un hende morto, y si no ta un morto natural e ora nan tin cu haci un poco mas di investigacion pa wak si ta suicidio of no.
Hopi biaha Respaldo ta via media ta tende cu un persona a kita su bida. Nan no ta wak e cifranan ey of e personanan. Loke si e organisacion ta haci ta purba na wak si e persona ta conoci cerca nan. “Pasobra bo kier siña di cosnan cu por mehora. Mi no kier bisa nos ta haci foutnan pero tin biaha bo por haci cosnan miho.” Kingsale ta sigui splica cu na momento nan mira den media cu un persona a kita su bida, nan ta check si ta conoci cerca nan.
Mayoria biaha nan no ta conoci na Respaldo. P’esey e psychiater ta puntra su mes si e ora ey Aruba ta asina un excepcion cu otro paisnan. Pasobra na otro paisnan 90% di esnan cu kita nan bida ta conoci cu un problema psikiatrico.
Si bo pensa riba esaki, e lo por nifica cu nos tin menos problema psikiatrico, cu hende cu ta comete suicidio no tin problema psikiatrico, of ta nifica cu no ta buscando ayudo na tempo. P’esey dus ultimamente nan ta kita nan bida sin tin un diagnosis psikiatrico, cual ta un problema scondi tin eynan. “Door cu no tin suficiente ayudo of nan ta sinti cu ainda tin un drempel pa busca ayudo, ta kita nan bida sin ta diagnostica of conoci na un instancia.”
