Recienemente di un forma extraordinario, gobierno a yama un conferencia di prensa p’asina informa pueblo di cosnan positivo. A categorisa e anuncio como algo sumamente importante pa pais Aruba. Casi no por a kere, mirando cu ta prome biaha den dos aña cu a mira henter e gabinete hunto den sala di prensa di gobierno den ora di anochi p’asina informa cu tin placa extra pa inversion.
Prome minister y minister di finansa a indica cu debi na bon maneho financiero, Aruba ta conta cu 25 miyon florin extra pa por por haci inversion. Tur minister cu excepcion di Minister Glenbert Croes a hiba palabra y a bisa kico ta nan plan p’e placa extra cu nan ministerio a ricibi. Por ehempel, Minister mr. Xiomara Maduro a indica cu lo duna CAD 25 mil florin pa nan por implementa un sistema di hefboom nobo.
Minister Tjon a indica cu lo renoba post Oscar di Brandweer, Minister Endy Croes a vocifera cu lo renoba Julianaschool, Minister Ursell Arends a indica cu lo regla e posicion huridico di e trahadonan di SABA, Minister President a indica cu for di su ministerio lo pone fondo pa renoba entre otro dos brug, esun di Lagoen den Zoutmanstraat y esun pariba di Marisol Building. En fin, un cantidad di proyecto cu cada minister lo uza e fondo pa inversion.
A puntra e mandatario, ya cu tin ‘meevallers’, dicon no ta uza e oportunidad aki pa cumpli cu nan promesa di campaña. Manera ta conoci, na aña 2017 MEP a priminti cu lo haci enseñansa gratis pa tur hoben y mucha. Tambe e tempo ey, Minister Glenbert Croes a haci promesa n’e humilde ciudadano “Monty”, cu asina MEP drenta gobierno, nan lo baha edad di pensioen. El a haci un promesa na “Monty”cu, lo cuminsa na bah’e na 62 aña y cu tempo bah’e bek na 60.
E prome mandatario y alabes lider di partido MEP a reacciona bisando cu den cuadro cu acuerdo cu Hulanda, esaki no ta posibel. Tin cu uza 50% di fondo pa paga debe y 50% pa inversion. No por uza e placa na nan antoho, nan tin cu cumpli cu e palabracionnan haci. E mandatario hasta a indica cu no por uza e fondo pa adaptacion di salario etc.
A haya masha straño e contesta di Prome Minister, mr. Evelyn Wever-Croes mirando cu di otro banda, su colega y alabes ‘junior partner’di coalicion, a vocifera cu; e si, lo inverti den e posicion huridico di e trahadonan di SABA. Hasta a yega na palabracion cu sindicato cu, lo manda e placa directo p’e trahadonan pa evita cu placa pa disparce manera a sosode den pasado cu SABA. Pues, sea Wever-Croes no ta papia berdad of su colega Ursell Arends ta papia cosnan cu e no mester a bisa.
Di otro banda, recientemente cu gobierno a firma cu Hulanda cu un interes di 6.9% pa e fiansa haci den temporada di pandemia. Wever-Croes a menciona cu a firma na e ‘strafrente’, manera a categoris’e p’asina sigura cu pueblo no ta perde autonomia. Awo cu pueblo a mantene su autonomia manera gobierno ta indica, dicon ta tene cuenta cu locual Hulanda ta bisa y unda tin cu inverti placa? Gobierno ta parce sea manera semper, ta falta mas claridad of no ta coordina cu demas minister kico lo papia p’asina evita cu un ta contradici otro.
