Tienda di Educacion ta enfatisa tocante un custumber preocupante den nos sociedad y cu merece atencion directo. Pa algun aña caba, desde inicio di era di comunicacion virtual y digital, nos comportacion cu un aparato electronico a bin ta conoce cambionan radical. Prome cu e introducion di telefon celular of tablet ta television nos por a wak riba un dia. Ta algun canal so tabata disponibel, algun persona por a disfruta di mas canal si acaso tabata dispone di un satellite dish na cas por ehempel.
Nos comportacion y custumber actual cu un telefon celular of tablet ta pone riesgonan pa e desaroyo di nos yiunan. Segun algun recomendacion di World Health Organization (WHO), pa un mucha por crece saludabel e mester sinta menos y hunga mas fisicamente. Pa muchanan bou di 2 aña di edad ta recomendabel pa NO tin screentime, pues ningun uzo di telefon of tablet. Pa muchanan entre 2 te cu 5 aña ta na e maximo di 1 ora (60 minuut) pa dia.
Di 6 te cu 10 aña ta no mas cu 1,5 ora (90 minuut) pa dia. Entre e edad di 11 te cu 13 ta na maximo di 2 ora (120 minuut) pa dia.
Un otro aspecto importante pa desaroyo sano ta e cantidad di ora pa drumi. Segun varios estudio den e tema di salud di nos muchanan y hobennan tin algun recomendacion universal pa cada fase di edad dentro di 24 ora, pues pa dia:
Entre 1 – 2 aña: 11 pa 14 ora pa drumi
Entre 3 – 5 aña: 10 pa 13 ora pa drumi
Entre 6 – 12 aña: 9 – 12 ora pa drumi
Entre 13 – 18 aña: 8 – 10 ora pa drumi
Un aspecto hopi importante, cerca mayor of educador, ta pa observa nos mesun comportacion y custumber. Corda trece balansa entre e bida familiar y esun laboral. Ban traha bunita memoria cu nos yiunan, duna atencion, duna amor. Pues corda semper, nos ta e ehempel pa nos yiunan. Move mas fisicamente y pone menos atencion na e celular of tablet.
Tienda di Educacion ta pone enfasis riba educacion di un yiu.
Un sonrisa den cara di bo yiu por haci milager. P’esey ta importante tur mayornan of educador trece alegria, aunke nos tin suficiente den nos mente, pa nos yiu (nan) tin un infancia y desaroyo sin mucho preocupacion. Nan ta sostene mayor, educador of cualkier persona cu tin e tarea pa lanta un mucha cu cualkier preocupacion of pregunta. Nan ta duna servicio telefonico via 161 di dialuna pa diabierna di 8:00 am pa 8:00 pm non-stop.
Bienestar y siguridad di nos muchanan ta e responsabilidad di nos tur! Yama 161 pa cualkier pregunta tocante lantamento di mucha y hoben. Tienda di Educacion t’ey pa duna conseho y guia.
Cuida bo salud, alimenta bo mente cu positivismo y busca e balansa!
