Secretario di Vereniging Rijscholen Aruba a papia riba un preocupacion cu e tin pa cu uzo di borchi na rotondenan cu ta trece confusion pa usuarionan di careteranan di Aruba. Thomas Ruiz no solamente ta un instructor, pero ta miembro di e comision funda door di Minister di Husticia pa restructura rijexamen.
Por corda di un caso reciente cu a tuma luga na rotonde di Ponton. Un vehiculo particular a alcansa un ciclista. E accidente a sosode riba e zebrapad. A sigui un discusion riba rednan social di kende tabata responsabel di e accidente.
Como instructor, el a dicidi di acudi na e sitio pa mira pa su mes e situacion y a constata un fayo den e borchi poni na e rotonde.
E ta papia di e borchi B4 cu ta nifica: duna preferencia na tur e coredonan cu ta crusa caminda.
El a splica cu un di e prome cosnan cu mester tene cuenta cu ne, ta momento cu ta yega cerca di un zebrapad “mester tene cuenta cu tur e leynan rond di e zebrapad”. Pa e ta oficial mester tin e marca blanco riba caminda y mester tin e borchi di indicacion di esaki.
Tambe ley ta bisa cu tur chauffeur di vehiculo, cu excepcion di vehiculo special, mester duna e peaton cu ta crusando y ta bay crusa preferencia. Tur chauffeur cu ta acerca un zebrapad no mag pasa un vehiculo di motor riba mas cu dos wiel. E no ta conta pa brommer, scooter of bicicleta.
Si e no tin e borchi, e no ta oficialmente un zebrapad. E ora ta drenta vigente e ley di peaton. Ta valido e ora cu tur trafico drechi y robes di un peaton tin preferencia. Pues ora di crusa, e peaton mester para pa duna preferencia.
Pero na e rotonde specifico, ora cu caba di pasa e rijstrook, tin un otro regla cu mester aplica. E ta bisa cu no mag crusa dilanti trafico contrario (pa peaton tambe) y no por corta caminda. Pues esun cu ta bini di Tanki Flip no por corta caminda di e peaton.
Di otro banda tin e ley di FAVI. E ta bisa cu tur persona semi-ciego of completamente ciego (of cu limitacion), tin preferencia. E mester tin e baston y e preferencia ta tur caminda.
Esaki ta algo cu tur persona cu ta uza careteranan di Aruba mester tene cuenta cu nan.
