Dialuna anochi, durante un conferencia di prensa extraordinario di Gobierno di Aruba, minister-president a informa comunidad riba e resultado positivo di e maneho financiero estricto y responsabel, cu Gabinete Wever-Croes II ta hibando. El a splica cu hopi biaha e discusionnan riba e topico aki ta entorno Hulanda, si mester ta mas estricto, of si mester baha gasto, of aumenta entrada, etc.
Prome Minister cu hopi orguyo a comparti cu pueblo e bon noticia, cu pa prome biaha den historia di pais Aruba, Gobierno ta entrega un presupuesto supletorio pa 2023, cu entrada adicional di 25 miyon florin.
Prome Minister a expresa cu e ta sumamente orguyoso di su gabinete pa cu e logro aki, mirando cu den pasado, durante gobernacionnan anterior, presupuestonan supletorio tabata yega Parlamento, pa pidi aprobacion riba placa cu a wordo gasta caba, na fin di aña, casi na momento di tira pagara y e supletorionan aki semper tabata tin deficit adicional, chikito y tin biaha hopi grandi, di miyones di florin extra.
Desde cu Gabinete Wever-Croes a drenta gobernacion, semper a percura pa e presupuestonan supletorio ta budget neutral y danki na e bon trabou y disciplina di cada minister, awe por mira resultado positivo.
Cu e 25 miyon florin adicional, Gobierno por inverti den proyectonan importante pa pais Aruba. Durante e conferencia di prensa, cada minister tabatin e oportunidad pa splica na unda lo aplica e fondo adicional aki. “Mi kier gradici cada minister di e Gabinete aki, pasobra ta danki na e vision y determinacion y na e disciplina di cada un di nan, awe nos a logra esaki.
