Minister Plenipotenciario Suplente mr. Ady Thijsen y su casa Yshel Thijsen-Rasmijn a asisti na e concierto “Tula Herdenkingsconcert 2022” na Amsterdam. Ey e ex-parlamentario, cu ainda no a huramenta como Minister Plenipotenciario, a topa cu Secretario di Estado di Hulanda, Alexandra van Huffelen. E encuentro ta net den e siman den cual Gobierno di Reino Hulandes tin riba agenda un peticion pa duna Gabinete Wever-Croes II un aanwijzing pa no cumpli cu acuerdo pa mehora maneho financiero di nos pais.
E aña aki e concierto a consisti di actuacion di e Famoso Jazz Orchestra di Concertgebouw di Amsterdam hunto cu e pianista virtuoso, componista y arreglista di Corsou, Randal Corsen. Artista invita tabata e vocalista Curasoleño, Dibo Doran. Tambe presente na e concierto Minister Plenipotenciario di Corsou, Carlson Manuel y Minister Plenipotenciario di St. Maarten, Rene Violenus.
Desde februari ultimo Ady Thijsen ta na Hulanda pa asumi e funcion di Minister Plenipotenciario. Esaki despues cu Guillfred Besaril a opta pa tuma retiro pa motibo personal. Pero seis luna despues, ainda no a logra huramenta e politico pa e asumi e funcion den forma oficial. Na aña 2017 a purba nombr’e caba como minister pero no a logra debi cu no a logra pasa screening. Como cu a anuncie e biaha aki atrobe, a imagina cu a regla un ke otro cu si e por ta ministeriabel. Pero cu seis luna tra’i lomba, ta surgi e pregunta cu si por tin dificultad atrobe pa su huramentacion. Ningun otro politico den e gabinete aki no a tuma tanto tempo pa huramenta.
