Dialuna mainta a Fundacion Telefon Pa Hubentud a cuminsa cu loke ta celebracion en conexion cu e fecha di 20 di November como Dia Internacional y Nacional di Derecho di Mucha, como tambe e 23 aniversario di existencia di Telefon pa Hubentud. Inicio di un siman di celebracion a tuma luga na completo di entretenimento Gloria.
“E ta 23 aña pasa cu prome biaha un mucha a tuma telefon yama e number 131 y nan a ricibi loke ta sosten for di Fundacion Telefon pa Hubentud pa cu informacion, sosten emocional y tambe ayudo cu e tabata tin mester, asina su director, James Sneek a splica indicando cu semper ta involucra e actornan den comunidad den e celebracion di aniversario, esta e mucha y hobennan mes.
Sneek ta gradici The Movies cu a sostene nan den e proyecto caminda muchanan di International School a bini pa analisa diferente short films cu ta carga mensahenan. Pa e motibo ey e mainta a hiba e titulo di “Get the Message”. Fuera di saca e mensahe afo, mester determina cua derecho di mucha ta bin den e peliculanan. A puntra nan con nan ta mira cu e ta tuma lugar na Aruba y con nan kier mira e cambio pa futuro. E fundacion ta kere cu ta hopi importante pa mir’e for di e bista di e hoben. Kico e ta mira cu ta tumando luga y kico e kier como cambio.
E actividadnan ta continua diaranson na Colegio Hilario Angela caminda lo tin diferente actividad relaciona tambe cu derecho di mucha, for di e klasnan mas chikito cu ta 1 y 2, cu e sosten di Hunga Teca y despues pa klasnan 3 te cu 6 cu tambe lo mira diferente short films pa analisa cu nan. Mester bisa cu tambe ta conta cu e sosten di IBISA den loke ta actividad deportivo den cura di scol. E idea ta pa e muchanan siña pa medio di e actividadnan deportivo aki tocante nan derechonan.
E siman ta finalisa diabierna durante e programa di Nos Mainta. Pa di 6 aña consecutivo y hunto cu TeleAruba ta papia cu diferente actor pa trece dilanti tur loke ta hasiendo. Asina’ki ta percura pa tur stakeholders ta involucra y sa kico ta e importancia di derecho di mucha.
Sneek: Na momento cu un mucha sa di su derechonan, e sa tambe cuotro persona tin derecho. E sa di respeta esaki, pero e sa tambe di para pa su mesun derechonan. Sigur ora un persona ta purba haci mal uzo di esakinan.”
