Mundialmente tabaco ta mata rond di 6 miyon di persona cada aña. Esaki ta mas of menos un morto cada 6 seconde segun World Health Organization (WHO). Mas cu 5 miyon di e mortonan aki ta consecuencia di e uzo directo di tabaco mientras cu 600.000 ta resultado di e personanan cu no ta huma pero ta exponi regularmente na huma di tabaco, yama ‘second-hand smoker’.
Uzo di tabaco ta un factor di risico hopi comun den desaroyo di malesa no transmitibel. Bou di e malesanan no transmitibel ta referi na entre otro malesanan manera cancer, malesa cronico di e sistema respiratorio, presion halto, diabetes, malesa cardiovascular, obesidad y mas. Mundialmente, 14% di tur morto ta consecuencia di malesa no transmiti bou di adultonan di 30 aña of mas, ta relaciona cu uzo di tabaco directo of indirecto.
Investigacion haci pa Departamento di Salud Publico DVG na aña 2016/2017 a traves di un Health Survey a indica cu 12.6% di Aruba su populacion riba 20 aña ta huma y di e grupo aki es cu mas ta huma ta e hende homber cu un 20.4% contrario n’e hende muhe cu un 6.9%. Manera hopi otro isla den Caribe, na Aruba tambe e causa di morto primordial ta malesa no transmitibel. For di aña 2000 te cu 2010, un total di 33% di tur morto registra na Aruba tabata consecuencia di e malesanan cardiovascular, es decir, n’e problema di ader (bena). Tumor benigno of maligno (cancer) tabata causante di 25% di tur e mortonan, haciendo cancer number 2 riba e lista di causa di morto na Aruba.
Mirando cu e causanan primordial di morto na Aruba ta consecuencia di malesa no transmitibel y mirando cu e uzo di tabaco ta un di e factor nan di risico cu ta causa malesa no transmitibel, a introduci e ley pa limita uzo di producto di tabaco. Cu e ley aki gobierno y Departamento di Salud Publico ta trata na reduci e risico di malesa no transmisibel door di proteha e ‘second-hand smoker’, limita e uzo liber di tabaco cerca e usuario y proteha e hoben di cuminsa huma na edad jong.
