Telefon pa hubentud tin un programa na television cu ta yuda promove e actividad di e hobennan. Sherman Milliard, trahado social di TPH, a splica cu Telefon pa Hubentud ta un plataforma nobo. Por mir’e como un parasol y bao di dje tin diferente programa.
E programanan aki ta wordo traha pa comunidad. Telefon pa Hubentud mes ta bay cuminsa cu diferente programa. Tin Telefon pa Hubentud News, tin Telefon pa Hubentud Boletin, tin Telefon pa Hubentud Arte, Telefon pa Hubentud Sport. Asina lo bay sigui traha diferente topico pa e hobennan y door di e hobennan tambe.
Tin un conseho di hoben, cual ta tres diferente hoben cu ta den directiva di hoben di Telefon pa Hubentud. Nan mes ta bay bin cu diferente topico cu nan ta bay entrevista, nan ta bay haci diferente investigacion, pa laga esey bin dilanti riba un nivel di hoben y pa asina comunidad sa kico Telefon pa Hubentud ta haci y kico nan ta haci pa Telefon pa Hubentud.
Banda di esey Telefon pa Hubentud mes, esta Sherman Milliar y James Sneek, lo bin cu diferente topico tambe pa e adulto un tiki mas grandi y pa e profesionalnan. Ta wak cu full e range di e mundo socia di Aruba y e comunidad. Tin e muchanan, tiener, tin e adolescentenan, tin e profesional y tambe tin e adultonan. Pesey tin Telefon pa Hubentud TV pa traha diferente topico pa e comunidad.
Tambe, a cuminsa caba cu diferente tema. Tin por ehempel un caminda cu a bay un scol cu ta duna informacion riba termento, unda cu nan mes por cuminsa cu nan mesun pasprotocol, kico ta e diferente pasonan. Con e combinacion di Telefon pa Hubentud a traha hunto cu nan. A traha un video di 2 pa 3 minuut pa comunidad sa con Telefon pa Hubentud ta traha.
Tambe algun dia pasa a traha cu un Centro di Bario. Hopi hende tampoco sa cu Telefon pa Hubentud ta traha solamente pa e scolnan, sino tambe nan ta bay un Centro di bario, na Scouting, na un club di Futbol. Di esey tambe a traha un video di mas of menos 2 pa 3 minuut, pa asina Comunidad sa con ta traha hunto cu e centronan ey.
Asina tin diferente topico cu ta traha, con ta laga comunidad sa di esaki, ta via di nan canal di YouTube yama 131 Telefon pa Hubentud. Eyriba por mira tur e videonan di Telefon pa Hubentud na un manera hopi interactivo y visual.
Banda di esey ta bay traha videonan hopi mas grandi. Ta full un produccion total pa Telefon pa Hubentud TV. Esey lo ta riba temanan specifico. Ehempel di esey ta Telefon pa Hubentud mes, kico TPH pa haci, con largo nan ta existiendo. Ta traha full un splicacion kico ta Telefon pa Hubentud ta.
Tambe nan a tuma topiconan manera divorcio, termento, norma y balor. Di esey ta bay traha videonan di 20 minuut. Pa esey ta papiando cu diferente canalnan di Television pa wak si nan por transmiti esaki na television.
Kico kier logra cu esey
Por ehempel un mucha por mira e video eynan por ehempel na TeleAruba of riba nan website. Despues e mucha mes por traha un script di esey y laga wak con el a compronde e informacion cu e hoben a mira riba television of riba nan canal riba Youtube. Eyriba por fomenta e habilidadnan di e mucha pa e por analisa kico ta mas importante, ki informacion mester corda y con por trece esey over na un persona cu no a wak e informacion ey.
Ta laga wak kico Telefon pa Hubentud ta haci. Pero ta siña e muchanan tambe con pa analisa e informacion ora nan hay’e. Esey ta e manera con Telefon pa Hubentud kier ta mas cerca di comunidad y mas cerca di nos hobennan na Aruba.
Presencia di Telefon pa Hubentud
Telefon pa Hubentud ta hopi contento cu e aprecio, e cariño cu nan ta haya di comunidad. Aña pasa nan a pasa na diferente scol. E hobennan sa caba kico Telefon pa Hubentud ta. Nan sa kico nan por spera ora cu ta duna un charla.
Kico nan ta spera
Nan por participa. Nan voz ta wordo tendi y ora cu ta dunando un charla, e ta interactivo. Nan ta participa, nan ta duna nan opinion, nan ta duna nan inzicht tambe. Como profesional, TPH por mira topico riba un manera, pero hobennan ta bibando den e mundo actual. Nan por wak’e diferente y tin otro cosnan cu nan ta pensa. Nan tin e chens pa participa, pa duna nan opinion. Ta skirbi esey pa otro biaha ora duna un charla, ta duna informacion mas adecua, mas cerca di e hobennan hasta. Pesey ta wak e participacion y e sentido di satisfaccion ora cu ta duna un charla na cualkier scol, centro di bario, cualkier club di deportista, ta haya e feedback aki.
Yamadanan
E enfoke principal pa Telefon pa Hubentud ta e yamadanan cu ta drenta. Ta wak cu tur aña ta haya 1000 pa 1300 diferente yamada. No solamente via telefon pero tambe via e app di TPH. Esaki e muchanan por download’e y pone den nan telefon. Eynan ta haya pregunta, preocupacionnan, tambe e momentonan cu un mucha por wordo tendi. Por ta riba algo leuk, manera bay riba vakantie, of cu nan ta namora di un mucha na scol. Tur esey mag, pasobra esey ta e oido cu TPH ta duna nos hobennan. E yamadanan ta hopi halto ainda. Ta wak si cu algo a cambia den e diferente añanan di TPH. Ta mira cu topiconan cu hobennan ta yama p’e, ta bira mas serio. Ta wak cu e topiconan cu ta joke of prankcallers, a baha masha hopi. Ta mira cu e comunidad, e hobennan di Aruba sa pakico TPH tey.
