E conocido taxista Eugene Dubero di Taxi-140 a sinti su mes masha malo pa e hecho cu Nadiuska Santana Marquez, alias “La Poderosa” a keh’e na polis ayera nochi pa maltrato pisa. E taxista, cu awo ta sinti su mes un victima, ta sigura cu e no a agredi e señora y cu ta net lo contrario a sosode. El a sigura cu diamars awo e lo entrega keho contra dje pa “valse aangifte” pasobra e no lo laga e cos keda asina.
Awe mainta, sinta na su cas na Yucuri, e taxista Eugene Dubero a conta nos cu e ta casa cu sobrina di Nadiuska pero cu e ta un persona masha problematico mes. Danki Dios cu tin camara di siguridad na Sandra’s Garden pa prueba cu ta Nadiuska a bin dal su casa, cu ta e mesun sobrina di e señora Venezolana y cu locual el a haci mas bien ta defende su señora. E ta nenga di a dal Nadiuska cu stoel den lomba.
“E storia di e señora ki ta manera un novela”, asina Eugene a cuminsa su entrevista cu nos colega Brian Koolman di 24ora.com awe mainta na su cas. “E ta gaña masha hopi. Asina e ta bisa cu mi debe 1250 dollar, cu no ta berdad. E ta papia di un agresion, cu mi no a haci”, segun Dubero. El a admiti cu berdad e tabata sinta cu su famia na Sandra’s Garden, gewoon sinta patras cu mi casa y yiunan. El a drenta e baño patras duro cera, pa hala atencion. Despues a bay riba su ruman muhe sinta cu Eugene Dubero y el a dal su ruman. “Mi ta kere cu e tabata bou influencia di algo pasobra el a bira agresivo, el a coy boter pa tira y kier a bringa cu tur hende”, asina Eugene Dubero a conta.
Dubero no ta corda cu e tin problema cu ne. Al contrario, den pasado su pareha a yega di batie y el a lag’e den su cas pa cura di su heridanan. E semper a yud’e. Parce cu e ruman muhe, esta cuña di Dubero, tin un debe cu Nadiuska y como tal el a bay cobr’e den Sandra’s Garden na mal ordo.
Eugene Dubero a conta cu ora el a coy botter pa tira, mesora el a coy un stoel den man pa defende su mes. Segun e taxista, e tabatin su baby den brasa pa cual e mester a defende su famia. Si el a coy stoel mes tabata pa defende su mes. Pero Dubero a sigura cu e no a dal’e cu stoel den lomba.
Na final, Eugene Dubero a bisa cu e señora ta problematico y ta hay’e den problema cu tur hende. Si acaso a dal’e kibra su lomba, ta ambulance mester a busc’e eybou y no cu un dia despues ta arma un show dilanti ward’i polis pa purba haya atencion di pueblo.
“Tene cuenta cu e señora aki tin hopi padrino tur caminda. Semper e tin hende ta sali pa defend’e y sac’e di tur problema cu e haya su mes aden. Asina por corda loke el a causa tempo di Patruya 37 caminda cu dos polis a hera perde nan trabou y e mes a keda liber y te awe ta cana rond manera nad’un pasa”, asina Eugene Dubero a conta.
Na final el a splica cu Nadiuska ta planeando pa regresa Venezuela dia 17 di december proximo. E asunto di supuestamente cobra e ruman un debe cu e ruman a pag’e caba ta sea pa e bay cu mas cen Venezuela of e ta pa rek su estadia mas. “E ta campeon den e weganan aki y kere mi…e ta haya algun padrino pa yud’e keda tambe”, asina Eugene Duber a termina bisando. El a expresa di ta spera cu e capitulo di e novela La Poderosa lo a caba aki tambe.
