Departamento di Obra Publico a informa un biaha mas riba nan pagina di Facebook, cu tur cos ta mustra cu e trabou andando den area di Palm Beach lo keda cla pa fin di october. Un proyecto cu a conoce diferente retraso pa diferente motibo.
Den luna di maart a inicia cu e proyecto di RWA (rioolwater aansluiting) Palm Beach, pero a conta cu retraso. Hopi situacion a pone cu e proyecto a core un retraso, pero Departamento di Obra Publico (DOW) kier habri e caminda aki pa otro luna.
N’e momentonan aki e contratista ta trahando riba e parti di wapening di e supervloer y esaki ta bin riba e duiker. Riba schedule tin poni cu diabierna nan ta basha esaki cu concret. Sinembargo, otro siman ta cuminsa cu e trabounan di preparacion den e bermnan, p’asina pone e kabelnan di utilidad bek nan na luga y pa despues cera e bermnan.
Ta primera cu e siman despues, e concreto a cura y asina nan cuminsa cu e trabounan di e caminda, pa e por ta yena y despues ta asfalta e caminda. Pa fin di october nan lo por habri e caminda.
Retraso
E proyecto aki a conoce diferente motibo pa cay den un retraso. Un di e prome retrasonan tabata despues cu a coba e sleuf pa instala tuberia nobo, a bin topa cu kabel y tuberia daña y mester a drecha nan. Un otro motibo tabata cu e contratista mes a hay’e den problema temporal di logistica y financiero.
