Trahadonan di Astec, cu ta encarga tambe cu e parti di bahamento di container, etc. a dicidi di pone trabao abao. Tin di compronde cu tin barco aden tambe. E portanan ta blokia pa e trahadonan. Tin truk cu tin cu sali, pero nan no por.
Dave Franken di UPA a conta riba e desaroyonan cu ta andando. El a comenta cu tin tanto tempo ta tira awa den biña cu e compania pa yega na un contracto. Tanto e sindicato como nan coleganan a sinta na mesa y a ripara cu e cos aki no yama negociacion, sino e yama dictadura. Dado momento Astec no kier bin negosha na mesa. Nan ta yega y bisa cu ta esey tin y tin cu tum’e. Nan a mishi cu e aumento y tambe kier a mishi cu e bashigeld. Nan kier mishi cu e vakantieuitkering y kier mara e bonus di aña. Ta cosnan cu e sindicato no kier tuma. Awe ta basta, sin papia mes di e huma cu ta suta e coleganan di WEB, cu constantemente tin hende malo. UPA a sali cu e trahadonan di waf. Nan tin dos ora pa reuni cu nan. Ta pone un deadline y wak kico ta haci otro siman.
Con esaki ta afecta
E porta ta blokia, segun Franken. Tin truk ta drenta, pero no ta laga nada sali. Por bisa tambe cu ta mira e grua move. Tur e craneoperatornan certifica, ta para pafo. Eyriba tin un hende ta trahando cu no ta certifica. Cu ta pone bida di esnan trahando eybao na peliger. Ohala nada no pasa, pero e persona trahando cu e crane, no ta certifica.
Kico por sosode
Den pasado a uni, a welga, pero trabao a sigui. Esey a pone cu e forsa di UPA no tabata suficiente. Franken a splica cu ultimo biaha tabata un different ballgame. E biaha aki tur hende a sali pafo. Director a pone un hende cu no ta certifica. Pesey e trabao ta andando. Awo ban wak cuanto tempo e persona aki por traha. Ta bay duna e director te cu dialuna atardi pa duna su contesta. Sino otro siman e reunion lo bira un welga extendi.
Certificado
E certificado ta manera un rijbewijs pa ta riba e crane. Segun Franken tin cu sigui un curso y ora cu pasa examen, e persona ta keda certifica pa maneha e grua. E grua aki no ta cos di paar di mil florin, sino algun miyones cu e director ta pone na peliger, poniendo hende cu no tin diploma maneh’e. Ta papia di un hende cu ta traha den garashi, cu ta manehando e grua, cu no tin diploma. Ohala nada pasa nan, pasobra nan ta keda un colega. Pero asina aki no ta manera pa maneha un compania.
Por spera mas problema
Por spera mas problema, segun Franken. Nan no ta hala atras. Kiermen, nan ta decisivo bao di e trahadonan di waf. Ainda falta mas hende, pero nan no lo hala atras, Franken a finalisa.
