Awe tardi pa mas of menos 6:00 pm dos hoben a dicidi di bay core bais patras di Kapel Alto Vista. Un mayor a conseha nan pa no tuma e ruta ey pasobra nan no ta familiar cu ne, pero asina mes nan a dicidi di dal bay. Sinembargo, door di scuridad, e ciclistanan no a logra haya e caminda bek pa Alto Vista y a cuminsa bira preocupa. Nan a bisa cu eytras ta scur scur y no tabata mira nada. Na dado momento a dicidi di yama polis pa pidi ayudo.
Mesora un patruya di Polis a sali pa e area di Alto Vista, pero no a logra localisa e ciclistanan. A pidi ayudo di helicopter, cu a bin mesora y a cuminsa bula y lusa henter e area pa mira si ta logra di topa cu e ciclistanan perdi. A señala nan na altura di e mina di oro na Bushiribana. Aki piloto di e helicopter a guia nan cu un spotlight pa nan yega te dilanti Bushiribana. E helicopter a keda na e sitio ta compaña nan te ora e patruya di polis a yega.
A tuma datos di e dos hobennan y ora e mama a yega na e sitio, e aventura di e dos hobennan di Sero Patrishi a termina. Un bon trabou di polis den cooperacion cu e helicopter. Asina un scenario di perdemento a caba toch feliz, di cual ambos hoben por a bay cas sin mas preocupacion.
