Recientemente a tuma luga un tayer virtual cu diferente departamento di Gobierno di Aruba y stakeholder, cual ta forma parti di e proyecto piloto den e proceso di e-Government. E proyecto piloto di e interoperability platform yama Conexion ta guia door di Cybernetica, cu ta un compania di Estonia. Cybernetica lo implementa e plataforma di interoperabilidad pa pais Aruba. Cybernetica a traha e plataforma exitoso pa Gobierno di Estonia.
e-Government ta mas cu un plan strategico y ta un cambio esencial den e manera di traha y un cambio crucial den manera di pensa. E cambionan cu ta biniendo ta indispensabel pa un miho maneho di Gobierno di Aruba. e-Government lo trece beneficio grandi no solamente pa e departamentonan di Gobierno, pero tambe na comunidad, sector priva, y ta un pilar central den masterplan di recuperacion y resiliencia ‘Reposicionando e Rumbo di Nos Pais’, ta e comienso di un transformacion total di gobierno.
Yuri Feliciano, Pilot Project Manager, a yama tur participante bon bini y a informa cu Cybernetica lo splica kico ta e plan den e proyecto piloto y cu den transcurso di otro siman lo tin diferente service workshop specificamente pa e parti tecnico.
E proyecto tin 3 meta principal:
- Intercambia data na un manera sigur
- Test y implementa servicionan digital
- Facilita entrenamento na trahadornan publico
Diferente pregunta a bini dilanti durante e sesion aki cu a dura mas o menos 3 ora. Algun pregunta cu a bini dilanti y cu a wordo discuti tabata entre otro:
- Con e proceso di e-Government a ser ehecuta na Estonia y kico a siña di esaki?
- Con Estonia a prepara e ciudadanonan pa uza e sistema?
- Con Estonia a haci pa educa e poblacion pa usa tecnologia digital pa haya acceso na servicionan di e-Government?
Hopi di e preguntanan aki tambe tin contesta den e plan di maneho y vision di Gobierno di Aruba cu ta carga e nomber, Aruba eGovernment Road Map, Building A Better Citizen Experience 2020-2025 publica na fin di 2020 pa Ministerio di Asuntonan General.
E tayer tabata uno hopi informativo y cu un audiencia di 50 persona di Departamentonan di gobierno y stakeholdernan den e programa piloto. Lo tin mas sesion den futuro unda cu mas stakeholder di sector publico y sector priva por haya oportunidad pa participa. E trayecto di e-Government ta un proceso riba termino largo cu lo encapara comunidad henter.
Experencia di Estonia ta cu cada biaha cu tin un servicio nobo semper tin expectativanan halto entre e populacion. Ta importante pa nota cu comienso di e-Government na mayoria pais rond di mundo ta tuma su debido tempo (pasonan chikito y firme) pero ta algo sigur y determinante. Den e proximo simannan lo tin mas informacion con e proyecto di e-Government ta progresando.