Ta investigando Polisnan cu a abusa di nan poder

2177

Polisnan di Minneapolis na Merca a detene George Floyd dialuna ultimo. Testigonan a mira con Polis tabatin’e na suela y un di nan a pres su pia riba nek di e sospechoso, kende tabata grita di dolor y cu e no por a hala rosea. Esunnan ey banda a filma e situacion y na mes momento tabata bisa e polisnan pa lant’e pasobra e no por hala rosea. A pidi asistencia di Ambulance, pa despues transport’e pa Hospital unda a constata su morto.

Pa diamars a kita tur 4 Polis envolvi den e incidente for di trabou. Esaki a pone cu mas di 100 hende a subi caya oa protest na Minneapolis den oranan di atardi den e caya unda a detene Floyd. Despues nan a bay na un di e Wardanan di Polis. Algun manifestante tabata grita “No justice, no peace”, como tambe “I can’t breathe” cu tabata e ultimo palabranan cu Floyd a bisa riba video di un hende cu a filma.

Pa plama e hendenan for di otro Polis a uza “tear gas”, despues cu e situacion a bay for di man. Tambe Polisnan a uza “foam marking rounds” na luga di “rubber bullets”. E foam aki ta pa marca esunnan cu Polis ta kere a instiga violencia.

Famia di Floyd a bisa cu nan kier pa persigui e 4 Polisnan pa asesinato. Segun Tera Brown, prima di Floyd, nan ta eynan pa sirbi y proteha, pero no a mira ningun di nan hisa dede pa yuda mientras e tabata roga pa su bida. Ningun di nan a purba yud’e. Mientrastanto FBI a cuminsa cu investigacion riba e morto di Floyd, enfocando si e Polisnan di Minneapolis a stroba Floyd den su derecho di privilegio protegi pa e constitucion of ley di Merca. Segun FBI, nan lo presenta tur loke nan haya na oficina di Fiscal di e Districto di Minnesota cu consideracion pa posibel persecucion federal.