Unico pashent di Covid-19 na Aruba ta recuperando bon

9807

Tabata desde dia 10 di april caba, como 6 siman pasa, cu e conocido peluquero, Humberto Jose Fuenmayor-Morales ta interna den unidad di cuido intensivo den Hospital Dr. Horacio E. Oduber. E ta contagia cu Covid-19 y tabatin mester di mashin di respiracion, pa por hala rosea, debi na retonan cu pulmon cu a bin como consecuencia di e virus. “E ta stabiel”, asina un fuente yega na su cuido a confirma.

E pashent a hay’e cu reto pisa pa hala rosea, pa cual mester a intern’e den Cuido Intensivo pa e por haya acceso na mashin di respiracion. A compronde cu e 6 simannan di cuido no tur dia a bay facil y sin reto. El a lucha hopi cu su salud y a gana e batayanan, tur dia miho. “Si e sigui asina, den e siguiente dianan e lo sali di ICU”, asina un fuente a sigura na nos, subrayando cu e proceso di cuido profesional y dedica, ta traduciendo su mes den un recuperacion satisfactorio.

Pa awe, Departamento di Salud Publico (DVG) a informa cu a test un total di 2105 persona na Aruba, di cual 2004 a test negativo, 101 a test positivo, di cual lamentablemente 3 pashent a fayece. Bon pa accentua cu 97 pashent a recupera di Covid-19, tin 158 hende den cuarentena y solamente 1 caso activo, cu ta precisamente esun di Humberto Jose Fuenmayor-Morales.