Showpsteward di SEPPA, Jasmine Angela-Croes a sigui splica cu tin 4 trahado cu tabata traha na stichting SAMBA, cu a bay over na FMAA. For di 2014, placa tabata wordo wanta pa FMAA for di nan salario, supuestamente pa pensioen.
Na 2016, diripiente e placa no tabata wordo wanta mas. Ora un di e coleganan a bay busca e informacion, nan a bin haya di compronde cu tur e añanan cu nan tabata paga nan placa tabata wordo wanta pa un plan di pensioen, nunca e fundacion FMAA a busca ni hinca nan den un plan di pensioen. Kiermen danki Dios na Dios mes, cu nada no a pasa ningun di e coleganan durante e temporada ey.
Pasobra si algo a pasa un di e coleganan, Dios so lo sa kico lo a pasa awe, no tabata tin un plan di pensioen.
Ta p’esey dia 4 di Februari, ora cu a walkout, cu a trece e preocupacion y disgustonan dilanti, e parti aki no a wordo treci den media. Pakico? Pasobra nan tabata tin un palabracion cu minister. A duna minister tur beneficio di duda pa el a busca un solucion pa e situacion aki. A acerca minister riba e situacion di e placa cu a wordo reteni, pa varios motibo. Trahadonan no por a yega na mesa cu doño di trabao, den e caso aki, e fundacion, mas. A acerca sindicato SEPPA, cu ta nan sindicato, pa sinta na mesa cu e fundacion. Tampoco no por a yega na otro. For di September 2018, Fundacion ta priminti cu tur luna e trahadonan ta haya nan placa bek cu a wordo wanta, awe nos ta na April y ningun di nan a haya nan placa cu a wordo wanta.
A haci un acuerdo cu minister. E ta bay haci un investigacion, e ta bay wak kico e por bay haci pa trece un solucion, wak ki tempo e trahadonan por haya nan placa cu a wordo wanta. Pero e desapunto mas grandi ta cu luna pasa, dia 26 di Maart pa ta exacto, SEPPA un biaha mas ta manda corespondencia pa minister riba e situacionnan cu ta andando y e minister no ta reaccionando. No a tende nada mas di e minister. E 30 dianan cu el a pidi na Januari, dia 15 a pasa y ta yegando dialuna na 90 dia y no a tende nada mas di dje. Minister no ta reacciona, a sabiendas cu dia 28 di Maart, e mesun coleganan aki cu ta ex trahadonan di SAMBA, ta wordo yama door di directie, pa un reunion. Ora cu a ripara cu nan sindicato no a wordo invita pa e reunion aki, ora nan a puntra, e contesta cu nan a haya ta cu SEPPA no tin nada di haber cu e asunto aki.
E reunion di 28 di Maart tabata pa e trahadonan wordo presenta pa un seguro priva, pa wak si nan por yega na un entendimento, un plan di pensioen, di cual no ta cumbini ningun trahado. Den e grupo aki tin varios trahado cu otro a yega e edad di pensioen caba, otro ta bay yegando e edad di pensioen y ki plan di seguro bo ta bay hinca nan aden.
Ora bo ta hinca nan den un plan di pensioen, plan di pensioen bo ta bouw op pa ora yega e edad ey. Si 28 di Maart bo ta yama un Guardian Group den e caso aki, no ta tres seguro manera cu minister a palabra na Januari, cu e lo duna e opcion pa e trahadonan scoge, nan ta scoge sin duna e trahado e opcion pa scoge riba nan mes, kico nan kier. Fundacion ta scoge cu ta den tal seguro ta hinca e trahadonan. Pero ken lo cumbini si un trahado ta haci 65 aña pa bay cu pensioen na Maart.
Un cu ta bay cu pensioen na Mei, kico ta bouw op? Kico ta pasa cu e placa cu a wordo wanta. Ningun di e cosnan aki no tin contesta riba nan. A bin compronde na final, cu e reunion di dia 28 di Maart, no ta door di e directie. E reunion ey ta yama door di minister. Representante di minister hunto cu e fundacion ta yama nan pa un presentacion di un seguro pa un plan di pensioen. Durante e reunion eynan un trahado cu a presenta ta wordo ofreci pa firma pa e ricibi e placa reteni. Pero danki Dios na Dios un biaha mas cu e no a firma. Cada un trahado individual a wordo yama. Pero nada no ta keda scondi. E berdad semper ta alcansa e mentira. Despues di esey, a bin haya sa cu directie, e director interino di e fundacion, cu bij deze ta un ambtenaar tambe, a yama un otro trahado cu ta trahado di ex Samba, cu lo ta cumpliendo su edad di pensioen na Maart. El a yam’e pa un reunion dia 13 di Maart y individual, caminda cu e ta wordo mal informa pa no bisa engaña. Informacionnan incorecto, incompleto. Riba dje un persona cu ta basta malo di salud, ta haya un papel bao di su nanishi pa e firma pa e por haya su placa cu a wordo reteni, pa e haya su placa manera ta firma y a firma su retiro. Esakinan ta weganan cu ta Angela-Croes ta puntra su mes, gobierno, minister cu ta esun ultimo responsabel pa tur e situacion aki. Pa Angela-Croes ta pega den su garganta y no tin gana di guli’e. E duda cu ta subi bin ariba. Esaki ta locual cu a priminti, a yega na palabracion y a duna beneficio di duda pa dun’e e espacio, en berdad, tur locual ta sosodiendo, ta parti di su maneho, Angela-Croes ta cuestiona. Angela-Croes ta casi kere cu e minister ta na altura di tur e situacion aki y toch ta aprob’e
