“E no ta un decision, nos kier crea diferente opcionnan. Nos a cuminsa brainstorm ricibiendo mensahe di mayornan y maestronan cu ta bisa: Bo sa lo ta bale la pena pa nos explora si nos por tin diferente orario di scol. Pakico tur scol mester tin e mesun orario. E ora ey nos a bisa ban start e consulta, no tin ningun decision”, asina dr. Rudy Lampe, Minister di Enseñansa, Ciencia y Desaroyo Sostenibel, a bisa awe durante un conferencia di prensa yama pa Gobierno di Aruba. El a aclaria e asunto aki, pasobra docentenan y algun mayor no a aprecia su idea pa scolnan basico bay caba te cu 3:00pm.
E discusion aki a bira popular bou di docentenan e siman aki, despues cu tres scol basico a cuminsa “hunga” cu e idea den nan skema di otro aña escolar, pues desde augustus di e aña aki. Den e skema (rooster) ta mira cu riba algun dia, scol ta caba 3:00pm den bes di 1:00pm. No necesariamente e alumnonan lo haya mas les, pasobra dne hopi caso, nan lo tin mas orarionna liber entre klasnan. Esaki riba su mes lo ta un formula nobo, pasobra normalmente scolnan basico conoce un solo klas, den cual studiantenan ta drenta 7:45am y ta sigui te cu 1:00pm cu dos pausa memey di 15 minuut cada un.
Minister dr. Rudy Lampe a enfatisa awe cu e proceso andando awor aki ta djis di consulta, debi cu e mesun mayornan y docentenan a acerk’e cu e idea aki. “Y si resulta cu no, cu tur hende kier keda manera e orario cu tin awor aki, cu ningun scol no kier ningun haci cambio, anto e ta keda asina ki! Pasobra nos tey pa sirbi e deseo cu tin den nos comunidad, nos mayornan, pasobra nan tin e derecho pa dicidi riba futuro di nan yiunan”, asina e titular di enseñansa a enfatisa.
Locual hopi docente no a aprecia ta e hecho cu a scoge pa papia cu mayornan prome, sin un consulta debido cu e docentenan mes, cu e scolnan mes. Nan critica ta cu no tin suficiente personal ni material pa por duna les den forma corecto y adecua pa e orarionan di custumber caba. Awor kier haci e orarionan mas largo, poniendo mas presion riba e docentenan pa traha mas ora, ofrece mas les, sin cu ta papia di adkiri mas material.
Minister a sigura cu e lo no tuma ningun decision sin cu sinta na mesa cu docentenan y directivanan di scol.
