Si un pensionado no ta biba na Aruba mas, bibando afo of e ta den exterior pa x tanto tempo. Mester tin un otro sistema cu por verifica cu e persona ta na bida pa e por sigui cobra su pensioen. Segun Edwin Jacobs di SVb, por lo general na cada pais tin un instancia oficial cu ta encarga cu e tipo di declaracionnan ey.
SVb ta entrena su trahadonan den tecnicanan forensico pa nan tambe por trata na detecta. No ta tur ora por. E ta un reto. Tin biaha bo ta haya documentonan cu bo ta duda, pero semper por pidi asistencia tambe di partnernan den reino y di embahadanan di reino Hulandes, pa verifica cerca e instancia cu ta otorga e constancia di bida, ta un instancia reconoci.
E instancia cu ta otorga esaki, mester ta un instancia reconoci pa e pais, pa por duna esaki. E persona no mester presenta na SVb y nan tin nan propio formanan cu nan por corobora cu atestate de vita, ta uno cu ta legitimo of valido. Tin cu bisa si, cu di e 9% di pensionadonan cu ta cobra p’afo di Aruba, 7% ta cobra na Hulanda. Y cu Hulanda tin intercambio automatico di informacion.
E otro 1% ta cobra riba un di e ex islanan Hulandes. Eynan tambe tin intercambio di informacion. E ora ta keda 1% cu ta cobra den e resto di mundo. En principio, e riesgo cu bo ta core pa bo fondo, tampoco no ta un riesgo grandi. Por lo general no ta pensioennan completo tampoco, sino mita. Pero ta vigila semper di cerca y semper por haci uso di embahadanan di reino pa yuda verifica si e instancia cu ta otorga e atestate de vita ta un instancia autorisa y ta existi. Awendia cu internet, hopi informacion bo por yega na dje tambe.
