Arthur Dowers: Crisisplan Social di Minister Glenbert Croes a bira un ‘Plan di Excusa y Incapacidad’

Ya no tin forma pa ministerdi asuntonan social, Glenbert Croes, trata na convence pueblo di con despues di 10 luna den gobierno, ainda e no tin un plan social den funcion y no a haci net nada cu un suma di 17 miyon c e tin presupuesta pa e supuesto plan aki.

Esaki ta loke miembro di fraccion di AVP, Arthur Dowers ta mustra, reacciondo riba declaracionnan cu minister Croes ta conta den tur declaracin cu e duna, acusando gobierno anterior di e crisis social.

“Algun dia atras durante di un reunion publico, minister Croes a declara cu miembronan di fraccion di AVP tin cu bay wak nos cara den spiel y mi ta spera di curason cu su persona tin un spiel grandi a e wak esun di dje aden, ya cu te ainda su plan social pa atende cu e crisis cu e ta papia di dje, no por ser mira ningun caminda.

Loke a sorprende hopi hende ta e hecho cu gobierno di Glenbert Croes, a dicidi di para bijstaand di 300 persona,  alegando cantidad di splicacion riba registracion sin tuma na consideracion e situacion di e grupo aki, di con nan no a logra na yena formularionan concerni na tempo.

Awor si bo ta forma parti di un gobierno cu tin e ‘hende cenral’ ta keda inexplicabel con bo ta dicidi den forma categorico di cancela bijstand di hendenan den necesidad real sin cu ta mustra convicencia y duna guia mas adecuado na e grupo aki.

Esey ta parti di e plan di minister Glenbert Croes, esta di cancela bijstand di hendenan cu ta den necesidad di e placa aki pero no ta un desaroyo cu a tuma luga awor ya cu den ultimo 10 luna di gobernacion di gobierno MEPPORRED, tin hendenan cu a perde na bijstand, algun a recupera esaki pero otronan cu ainda ta pasando den duro pa motibonan cu nan mes no por compronde.

Sinembargo e gran plan social di minister Croes no  ta conoci pa pueblo, nunca a yega parlamento pero si e stempelparlament cu ta sostene e gobierno aki, a aproba  den presupuesto 2018 un suma di 17 miyon florin pa ehecuta e plan social di  e minister aki.

Si minister Glenbert Croes tira un bista den un spiel, e por puntra smes y su consenshi di con ainda e grupo cu e ta bisa ta den crisis, ainda no a wordo yuda, ainda organisacion y instancianan social no sa kico pa haci y con pa haci esaki ya cu e minister ainda tin e placa wanta, poni un banda.

Ya caba e minister a inicia c’un proceso cu mester aprobacion di su stempelparlament di tres fraccion, pa su persona pone e suma aki den un fondo pa asina e por tin esaki na su disposicion pero di su plan mes no tin indicacion ni informacion.

Loke minister Croes tin cu haci ta di stop di busca excusa, stop di conta cosnan cu no ta berdad y stop di punta dede riba hendenan cu no tin nada pero absolutamente nada di haber cu su incompetencia pa hinca un plan social adecuado den otro manera cu e ta sigui priminti pueblo sin cumpli.

Minister Croes a cuestiona e hecho c’un colega dimi ta cuestiona su plan social pero a vota contra e plan social, sin cu e ta realisa cu fraccion di AVP no ta guli e su plan social cu ta mustra mas bien riba un tipo di ‘fata morgana’, esta un ilusion, manera su fraccion geel si ta haci.

Con por sostene un plan cu no ta existi y no ta wordo ehecuta y esunnan cu si a sostene su pensamento, awor ta mira cu nan tin cu bolbe bay sostene otro presupuesto nobo, caminda ainda e plan social no ta conoci pero si e minister lo pidi pa mas placa.

Na momento cu minister Croes menciona cu mi persona ta culpabel na e situacion social cu tin, e ta lubida cu tin cifranan anual,  cifranan cu ministerio publico a publica di tur loke a tuma luga y con esakinan a wordo atendi y soluciona.

Glenbert Croes mester stop di busca excusa, stop di culpa otronan pa su incapacidad y si kisas e pone mas atencion na loke realmente e tin cu haci, kisas e grupo di 300 persona aki for di kende su gobierno a cancela nan bijstand, awe lo no ta den problema asina serio caminda no solamente nan a perde nan bijstand, nan a perde placa pa yuda nan yiu sigui studia, pero ta wordo confronta cu aumeno di costo di bisa dor di aumento di BBO cu gobierno di e minister aki a impone riba tur hende,” Parlamentario Arthur Dowers a declara.