Aunke cu na inicio Gobierno di Hulanda a mara Aruba na un condicion cu nos edad di pensioen mester subi for di 65 aña pa 67 aña di edad, cu na final a acorda cu e lo subi cu un solo aña awo, esta pa baha cu pensioen cu 66 aña di edad. Esey no ta soluciona e problema si, manera cu Hulanda tambe sa. E ta tene SVb cu cabes riba awa pa 9 aña so mas.
E coalicion nobo ta hereda retonan bieu. Un di nan ta nos fondo di pensioen di biehes, maneha pa Banco di Seguro Social, SVb. Ey tin un problema structural cu merece atencion urgente. E retonan tabatey di algun tempo caba pero keda sin tuma un decision, ya no ta un opcion.
Mescos cu Hulanda a recomenda, SVb mes a avisa di masha tempo caba cu mester reforma awo, na por ehempel aumenta e edad pa baha cu pensioen na 66 aña di edad. Esey lo yuda e fondo contene un situacion di likides positivo te na aña 2030. Na e momento ey lo mester bolbe evalua, pa mira ki otro medida por tuma pa wanta e fondo solvabel pa e siguiente decada, den cual kisas atrobe lo mester considera un aumento den edad di pensioen of aumento den e prima mensual.
Director di SVb, ir. Edwin Jacobs a sigura cu anualmente nan mes ta audit nan cifranan, ta atende cu nan pronosticonan y ta considera e realidad economico di nos pais. Maneho di pensioen no ta algo cu ta sosode di un dia pa otro, sino semper ta atendiendo cu futuro y ta premira e desaroyonan di decadanan adelanta caba. Pues no ta awo cu Hulanda a bati bel nos sa cu mester aumenta edad, sino di algun aña atras caba. Mescos cu ta sosode rond mundo, tin mucho poco hende hoben pa carga e peso di e grandinan cu ta cobra pensioen di biehes.
Antes famia tabata consisti di dies yiu y awendia parehanan ta opta pa haya un solo yiu, locual ta cambia e panorama completo pa futuro di sosten social ora e un yiu ey alcansa edad di pensioen. Tambe ta tene cuenta cu awendia ciudadanonan ta biba mas largo compara cu antes, pues mas aña ainda pa paga pensioen. Cu tur esey den mente, mester keda reforma, ahusta y haci cambio pa tene e fondo di pensioen solvabel.
