Cu un score di 4-2 Dakota contra di Nacional, e Dakoteronan a titula nan mes campeon di Aruba su futbol despues di 23 aña. Fanaticada a celebra den grandi na Stadion Guillermo P. Trinidad. A organisa un parada chikito cu a culmina na Centro di Bario y Deporte Dakota unda a celebra e victoria di e campeonnan di Aruba su division di honor. Dos gol di Fernando da Souza number 17, gol di Ricky Hodge number 11 y Joel Valentin number 20 a sigura e copa pa SV Dakota.SV Dakota ta existi desde aña 1947 caba y durante e su trayectorio a sa di logra conkista e titulo di campeon di futbol division di honor na mas di un ocasion den pasado. Sinembargo, e ultimo biaha cu el a bay cas cu e trofeo tabata na 1995.
E organisacion ta conta cu futbolistanan di tur edad, cuminsando cu Mini baby, Baby, Lifida A, Lifida B, Menor, Mayor, Junioren, Damas y Division Honor. Na tur ta papia di mas o menos 175 hungado den total. Den e seccion di Division Honor, ta conta cu un ekipo cu 25 hungado, 4 staff tecnico y 4 miembro di directiva. Coach ta David “Appie” Abdul cu ta conta cu un amplio experencia den futbol Hulandes, hungando pa Sparta Rotterdam.
