Tromp ta un hoben studiante cu a bira victima di scam. Desespera pa cas na Hulanda, el a cay den trampa di un organisacion criminal. Y no solamente e, pero hopi mas studiante, por lo menos durante e ultimo aña.
E ta conta cu tur cos a cuminsa aña pasa, ora cu el a dicidi cu su pareha cu despues di estudio, nan ta bay Hulanda, cu nan yiu, pa sigui cu nan estudionan.
Tur hende ta bisa cu loke ta e parti di mas importante ta pa tin un vivienda na Hulanda, cual no ta facil. P’esey esaki tabata e prome aspecto cu nan a cuminsa traha riba dje.
Nan a cuminsa busca un cas, pasobra nan no tin famia unda nan por bay keda. Den e proceso pa busca cas, nan tabatin contacto escrito (email) cu diferente makelaar na Hulanda y ora cu por fin un persona a reacciona, a resulta cu tabata un tal Felipe. Cu un storia bunita, Felipe a conta nan cu e tin un cas na Utrecht, cu su mayornan a laga p’e. El a manda potret y adres. Nan a manda un hende bay verifica cu si e cas ta existi na e adres en cuestion y esey tabata e caso. Kisas e fout tabata cu no a averigua si tabatin hende ta biba eynan. Pero, manera e hoben ta bisa, pa falta di experiencia y presiona pa haya cas lihe, nan a cay pa e scam aki.
Nan a sigui
et, a haya adres, etc. door cu e pareha su ruman a bay eynan, a bisa pa bay check si e adres ta klop. E ruman a bay saca potret. E adres cu a duna tabata cuadra y apesar cu nan tabata tin duda, a sigui cu e proceso.
Tromp ta sigui relata cu durante di e procedura, a yega na areglo, a ricibi un contract di huur cu su nomber y un banda bashi, unda cu nan mes mester yega, firma y manda bek pa doño di e cas.
Rond di mei, a yega na un areglo cun’e cu e cas tabata 1043 euro y 2000 euro extra pa borg. Den e 1043 ta cubri e cas mes, cu costonan di servicio, cual ta algo cu tin cu paga na Hulanda, segun cu nan tin comprondi. Loke a hala nan atencion tambe ta cu a duna nan 24 ora pa manda e placa. Ora e yega na e proceso pa manda e placa, a manda nan un cuenta di banco cu no ta riba nomber di Felipe. Pero banco a informa nan cu no por manda e placa, si e no tin adres di e persona. A yama Felipe, kende a bisa cu e lo fix e problema. E splicacion tabata cu e ta doño di cas, pero el a laga otro hende encarga cu e cas y via dje ta haci e areglo di pago. Despues Felipe a manda nan un otro number di cuenta, cu otro nomber y te na Italia. Aki a sinti cu e cos aki a bira mas sospechoso. “Dicon full un otro hende, full un otro nomber, adres y pa colmo te na Italia.” Pero cu e desesperacion pa haya un cas na Hulanda, cu ta un tension bao di studiantenan, pasobra tin cu haya un cas y sin un cas bo no por haya un BSN nummer pa por draai na Hulanda, a sigui. Tur cos ta draai rond di e cas. Si bo no tin un cas, bo no tin nada. Cu desesperacion a bisa cu ta bay cun’e toch y a dicidi manda placa. E duda a keda crece mas. Ta manera cu e instinto ta bisa cu algo no ta cuadra.
Despues di a manda e placa riba diabierna, den fin di siman a bay riba e website, a lesa e comentario di e hendenan cu a yega di haci algo cu nan. A bin cay ariba cu tin hende ta indica cu por haya scammers.
Nan a realisa cu algo no ta cuadra y dialuna mainta tempran a tuma contacto cu banco pa cancela. Pero a tarda for di 8.30 te rond di 9.30 prome cu nan a haya contacto telefonico cu e banco, despues di a manda un email tambe, pa cancela e transfer. Ey banco a informa nan cu nan a caba di manda e placa. Nan lo bay mira kico por haci ainda pa recall. Pero despues di un siman no a tende y ora cu a tuma contacto bek cu nan, nan a informa cu no por haci nada mas.
Tromp a indica cu nan mes a bay haci un research riba e number di banco na Italia. Ora cu por fin a haya contacto cu nan, tabata tin e problema di idioma. A keda papia Ingles cu e hendenan na Italia, pero no por a compronde. Na final a haya un hende cu por a papia Ingles kende a bisa cu banco a realisa cu tin algo straño riba e cuenta y cu nan a blokea e cuenta, pero cu no cu nan a mira cu placa a wordo deposita of a saca placa for di dje tampoco.
Nan tambe a avisa e pareha cu lo laga sa. Pero cu banco internacional no por warda riba nan.
Tromp y su pareha a ricibi e realidad amargo. Ta un placa cu nan a spaar pa e parti di cas. Apesar cu nan ta bay cu e becadonan, apesar cu nan ta bay haya placa, nan mes kier a bay cu algo toch den man sigur. E mes a core bende su auto pa por a haya e placa. “Aworaki nos a perde tur cos. Nos a perde 6 mil florin cu nos a traha duro p’e. Nos a bay cerca un hende cu nos no sa ni ken e ta, si ta un hende homber of hende muhe.”
Nan tabata tin comunicacion cu nan mentor na Hulanda, kende a conseha nan pa bay haci denuncia, busca e hende y ora yega Hulanda pa sigui cu e caso.
Tromp mes no ta un hende cu ta papia di nada personal. “Eseynan ta mi problema y mundo no mester sa. Pero mi a dicidi di bay haci un denuncia y e agente policial a bisami cu for di aña pasa pa awo, ta riba 200 studiante a bin haci denuncia pa un caso asina.” E ta hopi, segun Tromp. Y ainda tin hopi studiante no sa unda no ta bay keda. Tin di nan tin famia cu nan por bay cerca nan. Pero no por keda largo cerca nan. Mester tin un propio cas pa por haya un BSN nummer y sin esey no por move.
Ora cu Tromp y su pareha a tende esaki, nan a dicidi cu no por keda keto. No ta pa nan, pasobra nan no ta bay haya e placa ey mas, ni kico cu nan haci. Pero nan por preveni pa otro studiantenan no pasa den algo similar, of esnan cu ta bay otro aña. P’esey Tromp a pensa cu ta miho pa post’e online, bay prensa y pa otro studiante, mayornan, docentenan, voogdnan, loke sea, cu tin nan yiu of studiantenan cu ta bay Hulanda, cu ta bay ta riba nan mes, pa nan “no manda placa pa ningun pero ningun hende cu bo no conoce personalmente. Y si bo conoce personal mes, miho bo haci’e via un Credit Card of Paypall, pasobra bo por trace bek bo placa y hay’e bek.” Den e caso di Tromp, nan a haci’e via transfer y no ta haya e placa ey bek. Ta lamentabel pa nan, pero e ta un wake up call pa esnan cu por ta pensando pa bay haci esey. “Miho bo tin e placa ey den bo man na Hulanda cu bo mand’e pa un hende cu bo no lo hay’e bek.” Esey tabata su conseho na hobennan cu tin pensa di bay studia na Hulanda.
