E acto di vandalismo cu a tuma luga riba edificionan di Monumentenfonds tabata algo lamentabel y como tal Anne Witsenburg-de Jong Director Stichting Monumentenfonds Aruba a duna su reaccion riba e sucedido. Dialuna a haya nan confronta di sorpresa cu e noticia cu un persona a comete vandalismo / grafiti riba dos edificio. Ta trata di Stadhuis como tambe Algemene Rekenkamer cu antes tabata fungi como Biblioteca pa nos Isla.
Procedura comun cu ta tuma luga ta haci un denuncia. Monumentenfonds a bay pone denuncia den e caso aki tambe, y ta reacciona manera semper cu atencion riba e hecho cu a purba destrui herencia cultural di nos Pais. Expresion /pensamento di hende den comunidad cu kier vocifera descontento por ta politico of otro preocupacion pero ta scohe monumentonan pa haci esaki, ta robes. Un suplica ta bay na un y tur pa por fabor no mishi cu monumento , sea cual kier sea e mensahe.
Ta comprende tambe cu tur gasto ta cay riba e stichting, cu na e momentonan aki ya caba ta drechando e daño cometi y cu cualkier mensahe cu por a laga atras, esaki no ta keda.