Costo di bida ta sigui subi, pero si bay puntra CBS, nan ta bisa cu e cifra indice ta den negativo. Esey ta loke cu presidente di sindicato STA, Diego de Cuba a expresa.
E ta sigui bisa cu cualkier hende cu un tiki sano huicio ta puntra con e cifra indice ta den negativo, cu no tin inflacion y prijsnan ta keda subi. Tur hende ta wak esey.
Sa medidanan cu e gobierno di coalicion actual tabata practicamente inevitabel, di tempo cu a cuminsa cu e proyectonan di Green Corridor, Watty Vos Boulevard y Hospital, ta proyectonan cu practicamente cu a trahanan cu placa cu no tin. A bay presta placa. Ora cu presta placa den sumanan cuantioso, e interes cu tin cu paga durante e periodo cu tin cu paga, ta bastante halto y ta loke a sosode. E ta masha facil pa goberna cu placa presta. Pero na final di cuenta, ken ta bay paga pe, ta e pueblo.
Pesey e ta bisa PPP (pa pueblo paga). E cosnan aki a premira nan y a adverti e gobierno anterior, pa faseer e proyectonan aki. No haci tur den un solo tiro, pa haci un bunita expectaculo, bunita show. Na final di cuenta ta e clase trahado, e consumidor ta bay paga e prijs. Pueblo tin di bay paga e prijs atrobe.
Si bo ta haya un minister anterior, ta grita den sala di staten cu e ta orguyoso di e debe cu a hinca e pais aki aden, mester ta hopi loco di remate pa grita un cos asina. Si bo ta bay haci un prestamo, pasobra bo no tin e placa pa bay ehecuta cualkier proyecto of bay cumpra algo. Bo ta bay haci’e, pasobra bo tin un necesidad. Pero aki no tabata tin ningun necesidad.
Si tabata un necesidad, mester a evalu’e hopi bon. Pasobra a haya e chens pa haya placa presta na moda facil, PPP, pero na final di cuenta, ata e golpi ta bin awo riba pueblo. Awor aki ta premira, cu esaki por tin consecuencia tambe pa negociacionnan di CAO andando, pasobra logicamente tin cu bay pidi tiki mas, mirando e situacion aki. Si ta bisa cu aumento di BBO, BAZV, B-AVP tambe a bin den touw, e clase trahado ta bay sinti’e. Ora cu bay cumpra algo, bo sa di bay paga mas riba dje. De Cuba a splica cu e ta prefera di paga esey, cu mira Hulanda cana drenta y bati nos atrobe cu un KB. E lo prefer di pag’e como un Arubiano orguyoso di su pais y no laga e Hulandesnan aki cana drenta. Nan a cana drenta caba, cu permiso di gobierno anterior ora cu nan a firma e documento di Geen Bezwaar. Ata nos cu Geen Bezwaar y CFT y dios lo sa ki tempo esey lo caba, de Cuba a bisa finalmente.
