Di 1 pa 3 di juni 2018, Aruba Investment Bank, mihor conoci como AIB BANK N.V., lo ta presente na FRED Expo, na Rotterdam. E expo aki, dedica na atrae profesionalnan di Aruba y otro partinan di reino hulandes pa bin traha na nan país, entre otro Aruba, ta andando varios aña caba y ta conta cu atendencia grandi.
Tin pensa cu na Aruba no tin oportunidad na nivel, manera tin na Europa. Esaki ta haci cu hobenan bon studia ta scoge pa keda den exterior pa crece den nan carera profesional. AIB kier mustra cu na Aruba mes tin amplio oportunidad pa eherce un trabou cu e hoben nan a studia p’e, gana un salario competitivo y disfruta di un bida di famia aki mes na cas. E meta den tur esaki ta pa topa studiantenan y profesional local na hulanda y mustra nan riba e posibilidad di nivel cu por ta disponibel na Aruba no solamente awor pero tambe esnan cu por bin disponibel den un futuro cercano mirando e impacto cu vergrijzijng por tin riba continuidad di desaroyo di nos isla. Tin vacaturanan na AIB mes y tambe na varios empresanan local cu ta relaciona cu AIB.
Pa e desaroyo continuo di nos pais ta importante pa nos tin hende bon prepara den puestonan clave, pesey AIB ta asina motiva pa presenta na FRED cu un Booth pa conecta personalmente cu profesionalnan local na Hulanda. Tambe AIB tin presentacionan prepara pa amplia ariba e posibilidadnan cu tin na Aruba.
Asina AIB lo desea pa fungi como un magneet, pa atrae talento profesional pa Aruba, demostrando cu aki tin oportunidad pa eherce un funcion di nivel halto, disfruta di un compensacion mereci, y biba un bida felis y comodo na nan isla natal.
