Un grupo hopi entusiasma di boluntario a bin hunto for di 8:00am na St. Dominicus College pa haci trabou di mantencion y pasa un man extra di verf na e plenchi di scol. A dedica un total di 80 ora di servicio comunitario na e proyecto aki.
Na final di dia e cabesante di St. Dominicus College a sorprende e miembronan di Kiwanis Club of Aruba cu un certificado di aprecio pa e tempo y trabou cu nan a realisa pa e scol.
Diasabra dia 24 di october a tuma luga e proyecto anual di “Kiwanis K- One Day”. Rond mundo, riba e di cuater diasabra di october, tur club di Kiwanis ta haci un proyecto comunitario. E idea ta pa e miembronan haci un proyecto hunto cu e meta pa finalisa esaki den un dia.
E aña aki e comision di “Kiwanis One Day” di Kiwanis Club of Aruba a scoge como proyecto pa duna un “facelift” na St. Dominicus College. Cu e proyecto aki Kiwanis Club of Aruba kier contribui di un manera positivo cu e muchanan y comunidad di Playa.
Kiwanis Club of Aruba ta gradici tur e miembronan, maestronan y boluntarionan cu a haci “Kiwanis ONE Day” uno exitoso. Danki na tur esunnan cu di un of otro manera a duna un man pa asina logra realisa e proyecto. Kiwanis Club of Aruba ta desea e alumonan di St. Dominicus College hopi exito den e aña escolar 2020 – 2021.
