Parti di Avenida Nelson Oduber ta cera pa amplia red di awa preto

Desde ayera diasabra tin un parti di Avenida Nelson Orlando Oduber (Sasakiweg) cera debi na trabounan di cobamento tumando luga memey di e caminda grandi cu ta contecta nos isla na e area di hotelnan highrise y e districto di Noord. Gobierno ta coriendo tubonan grandi pa por amplia nan red di awa preto, esta e sistema di riool. Un ke otro tin di haber cu finalisacion di e proyecto di The Movies IMAX @ Gloria.

Parce cu pa hopi aña, DOW a percura pa tin henter un red bou tera di tubonan di rioolering cu ta conecta na e rioolwaterzuiveringsinstallatie na Bubaliplas. Pero, e tubonan ta core na e banda di Pizza Hut so. Na e otro banda, no tabatin desaroyo, pa cual no tabatin necesidad pa tin un red (netwerk) di tubo bou di tera.

Pero cu binmento di e proyecto grandi di The Movies IMAX @ Gloria, awor si tin necesidad pa por tin tubonan coriendo bou di tera pa por conecta e sistema di awa preto di e proyecto ey y tur otro cu ta biniendo den e area ey. E siguiente conexion di tubonan ta te banda di Alhambra Casino, pues ta bastante leu. Cu e proyecto nobo di DOW, awor tur e edificionan nobo lantando den e area aki tambe lo ta conecta na e red di awa preto.

Ta cobrando un canal basta hundo pa pasa tubonan grandi di un banda di Sasakiweg pa e otro. Di e forma aki ta amplia e red di awa preto den henter e area aki, cu ta creciendo rapidamente e ultimo temponan aki.

Tocante The Movies IMAX @ Gloria

Dentro di algun siman mas lo inaugura e proyecto di The Movies IMAX @ Gloria na altura di Sasakiweg. Lo tin varios sala VIP, lo tin un sala grandi uzando e tecnologia IMAX, di cual The Movies tin e derecho exclusivo pa Aruba! Den e sala IMAX e luznan no ta bombionan grandi mas, pero nan ta laser. No tin un solo projector pa haya claridad riba e screen grandi, sino 2 projector y 2 laser proyectando riba e mesun film. E ta digital riba un pataya enorme y cu un zonido cu antes tabata single track cu un speaker tras di e pantaya. Pero awor, den e edificio nobo, lo uza tecnologia IMAX cu tin 12 track, pues un zonido for di e mundo aki. E diferencia di mira e mesun pelicula via Netflix na cas of bay IMAX, ta un diferencia enorme.

MetaCorp, den cuadro di celebracion di nan 100 aniversario e aña aki, a opta pa haci un inversion hopi mas grandi den e proyecto di The Movies IMAX @ Gloria. Esaki como honor na nan prome negoshi, cu tabata e negoshi di cine. E proyecto total ta alcansa un inversion di no menos cu 40 miyon florin y lo bira un di e teatronan di cine mas moderno den henter e area aki. Algo pa Aruba ta orguyoso di dje!

Separa di solamente salanan pa mira pelicula, The Movies IMAX @ Gloria lo bira mas bien e centro di entretenimiento nobo pa nos pais, cu diferente restaurant reconoci den e mesun edificio nobo aki, manera entre otro P.F. Chang’s, Starbucks, un restaurant Italiano y sin lubida un area grandi pa muchanan por hunga.

Noticia relacionaMas for di e autor