Mañan diasabra lo tuma luga e “31st annual Alumni of Distinction Ceremony” na e campus di e scol na Canada. Ursell Arends, considera como un “Alumni of Distinction Honouree” lo ricibi un reconocimiento special. E scol ta orguyoso cu nan ex-alumno awe ta Vice-Minister Presidente di pais Aruba. E mandatario a biaha priva, riba su propio costo, hunto cu su famia pa ricibi e reconocimiento.
St, Clair College ta situa zuidwest di Ontario, na Canada. E ta funda na aña 1966 pues tin 58 aña di existencia. Lema di e scol ta “Start Here. Go Anywhere”. E scol ta conta cu 264 docente y personal administrativo pa maneha 6933 alumno.
Ursell M. Arends a nace na Santa Cruz. Na aña 2000 el a bay studia Business Administration & International Business Management na Merca y Canada. Desde aña 2007 e ta trahando y a crece den su funcion y yega te na Operations Director na La Quinta Beach Resort.
Entre aña 2016 y 2018 e tabata presidente di Aruba Timeshare Association (ATSA). El a funda Partido Raiz na aña 2017 y den su prome salida a logra 1433 voto riba su nomber. Den eleccion na juni 2021, Ursell Arends tabatin 1939 voto personal, cu ta representa un aumento di 35%.
