Personal di WEB a presenta cu urgencia pa atende cu situacion riba caminda principal di Piedra Plat direccion Santa Cruz na momento cu un tubo bou di e caminda a kibra y cuminsa spuit awa.
Esaki tabata basta tempran, den careda di 8:00 am ora cu automobilista a indica cu tin un fontein riba caminda grandi. E forsa di e awa tabata suficiente pa kibra e asfalt y awa tabata spuit bay halto. Ademas di ta un perdida di awa, e tabata un peliger pa trafico den e area.
Awa na abundancia, tabata algun di e comentarionan mainta tempran ora a bin topa e scenario aki riba caminda. Personal di WEB a cuminsa cera algun area pa asina mira si por baha e presion di e awa y asina cuminsa cu e tarea di drecha e tubo cu a kibra.
A despacha diferente truck di WEB pa bin duna un man mientras por a yuma nota tambe cu trafico di e ora ey a cuminsa pega. Te asta algun a propecha di para un rato y uza e momento como carwash pa nan vehiculo.
Pa locual ta trata e vecindario, hopi ta esunnan cu lo a lanta mainta y haya sopresa cu a kita awa pa soluciona e probema cu a surgi den e area. Personal di WEB mientrastanto tabata trahando duro pa asina resolve e problema.
