Mirando cu diaranson ta Dia di Rey, tin varios preparacion andando caba p’e dia aki. Riba Wilhemina Park por ehempel, tabatin preparacion andando pa un ceremonia cu lo tuma luga mañan. Durante e ceremonia aki, Su Excelencia Gobernador Alfonso Boekhoudt, lo haci entrega di e Copa Felipe B. Tromp na un seleccion di futbol como tambe lo entrega e Premio Estimulo na e hoben Aaron Arenas. Riba e mainta aki, tabatin varios training pa loke ta trata e hisamento di bandera.
John John Flemming di Departamento di Cultura, a comenta cu ayera el a haya diferente yamada despues cu varios ciudadano a tuma nota di un palo cu dos bandera na dje, pa ta excato bandera di Hulanda y Aruba. Comision Celebracion Dianan Nacional como tambe Departamento di Cultura a haya varios reaccion riba esaki tambe, Flemming a comenta cu kisas cu bon intencion pero fuera di e protocol pa loke ta trata bandera.
El a sigui splica cu no ta permiti pa uza dos bandera bou di otro, no ta importa di cua pais e ta. Mirando cu mañan ta Dia di Rey, ta hisa esun di Hulanda of si e persona no tin, e por hisa esun di Aruba. Flemming ta comenta cu ta importante pa sa e reglanan na momento di hisa un bandera. Den e ultimo añanan no a regla esaki, tanto pa e bandera como tambe pa “boet”. Den e caso aki, a yama DOW y demas instancia pa nan tuma contacto cu e personanan cu ta encarga cu e bandera p’asina nan por regla esaki.
CON TA HISA BANDERA
John John a comenta cu si bo tin dos palo di bandera mes y bo kier hisa e banderanan mañan, bo mester hisa esun di Hulanda na bo man robes y na bo man drechi bo ta hisa esun di Aruba. Si acaso bo ta lomba p’e edificio, esun di Hulanda lo mester ta na bo man drechi y esun di Aruba na bo man robes. E aña aki lo bin cu un buki p’asina tur hende por compronde e reglanan na momento di hisa un bandera.
BANDERA DI AUTO
Pa loke ta trata bandera di auto, Flemming a comenta cu e ta un “versiering”. Unico hende cu tin esaki di un manera oficial ta Gobernador di Aruba, e tine na su banda di bumper. Asina ta indica cu Gobernador ta den e auto. Pa publico general, por pone esaki na banda di e chauffeur pero patras. Si pone na e bentana di e chauffeur, e por bira incomodo ora cu e chauffeur kier saluda y baha bentana. No tin regla specifico pa esaki.
John John Flemming a comenta cu locual a pasa n’e rotonde, ta un eror humano. E no ta sinti cu ta discriminacion of algo haci cu mal intencion. Departamento di Cultura ta evaluando pa aplica algun instruccion riba e website di Gobierno. Locual falta ta algun parti di e strafvordening cu no ta cla ainda, pues falta pa haya sa kico ta e sancionnan cu lo duna na momento cu no tin e bandera hisa di un manera corecto. Flemming a duna e ehempel cu hopi biaha tin cas cu tin bandera hisa henter anochi sin luz, esaki mes ta un falt’i respet. Bandera ta parti di nos identidad y nos mester tin respet p’e.
KICO HACI ORA UN BANDERA BIRA BIEU
Hopi hende no sa con mester deshaci di un bandera na momento cu e bira bieu. E manera corecto pa deshaci di dje ta pa hinc’e den un saco di papel y kim’e pasobra no por djis bent’e riba dump. Ta importante pa sa con pa deshaci di e bandera di un manera corecto.
