Sindicato di Polis Arubano a yama un reunion urgente cu su miembronan pa asina elabora mas riba e puntonan di medida imponi pa Gobierno. E acogida di e reunion aki tabta uno bon p’e sindicato, contando cu presencia di basta miembro rabia. Tur esaki tin di haber cu dia 22 April despues di a ricibi un carta di notificacion di Minister Presidente.
E carta tabata notifica medidanan cu no a bay via un dialogo. Jose Dirks, presidente di SPA, a bisa cu Gobierno a skirbi den e carta e medidanan cu lo implementa. Tur esaki e sindicato a bisa e miembronan y e ta un situacion cu no a cay na bon tera cerca nan. E miembronan a spera di un dialogo y p’esey nan a bini hunto. Cu mocion di e miembronan, SPA ta bay traha un carta dirigiendo esaki awe mes pa Minister Presidente, segun Dirks.
Un di e disgustonan di mas grandi pa nan ta cu a yega tuma un decision sin consulta cu nan, kendenan ta e frontline. E di dos ta como frontliners nan tin hopi stress. Normalmente nan ta traha cu menos polis y awo nan ta trahando tur anochi den e toque de queda. Esey ta nifica cu tur dia ta traha overtime. El a sigui bisa cu e stress emocional ta hopi halto entre e polisnan pasobra mester atende cu hendenan riba caya cu tambe tin hopi stress halto mirando e situacion economico y virus. Tambe e sindicato tin cu mira con nan ta bay handle cu Gobierno a base di e informacion duna.
Pa awo SPA ta enfocando completamente riba polis, mirando cu e stress ta hopi grandi entre nan. Ora cu tin mas tempo lo delibera cu otro sindicatonan, pero pa awo staats gewijs nan tin cu bay check tur cos na importancia di polis. P’esey e sindicato lo ta sacando un carta di nan mes y lo ta poniendo den e carta un tempo di reaccion.
Asina cu nan ricibi un reaccion di Gobierno, SPA lo bolbe yama un reunion di urgencia cu su miembronan. Segun Dirks, nan tin e trabou na curason. Aunke cu nan ta den un momento di stress, nan ta stima e trabou y lo keda haci esaki. “Cu despues por tin consecuencia, ta laga esey den man pa mas despues.” Ta hopi prematuro pa bisa ki otro accion SPA por tuma si en caso e miembronan ta dispuesto pa tuma.
