E homber aki ta deteni y ta pasando un proceso di interogacion. E ta sospecha di a maltrata su pareha. E departamento di Jeugd en Zeden Politie tin e caso y ta atendiendo e proceso di interogacion. Ademas di denuncia pa motibo di maltrato contra su mesun pareha, e homber aki tin denuncia contra dje di violacion sexual.
Su mesun pareha a denuncie pasobra e kiermen e homber a tene relacion sexual cu ne contra su boluntad. Claro cu e denuncia aki ta serio y si comproba e acusacion, e homber lo tin cu responde pa castigo pisa den Corte. Claro den casonan asina ta necesario pa por tin pruebanan di apoyo (steunbewijs) cu por uza pa convence un hues den corte. Sino e lo bira e di y ami ta nenga!
Pa e caso di maltrato, e homber ta poco mal para. Pa loke ta e denuncia pa cu e violacion contra su mesun pareha, parce cu e denuncia ta poco suak. E homber ta nenga y e ta e tipo di denuncianan di uno contra uno. Kiermen sin otro evidencia of prueba e lo bira un problema pa wanta e homber pa e denuncia di violacion.
Diadomingo ainda e homber a pasa den e proceso di interogacion. Atardi despues di interogacion a bay cu ne warda di polis na San Nicolas. Eynan e lo keda cera pendiente e proceso cu ainda falta. Si husticia dicidi cu e mester keda mas, e chens ta grandi cu e lo bay KIA despues di 10 dia di encarcelacion den cel na un ward’i polis. Si esey no ta e caso, pronto e lo bay liber.
