Diadomingo atardi un unidad di polis di Noord a para un auto banda di Eagle Bowling. Den e auto tabatin un homber ta stuur y un dama na banda. Ora a bay atende cu e chauffeur, a resulta cu e no tin rijbewijs.
Stuur auto sin rijbewijs ta violacion di ley y bo por perde bo libertad. E chauffeur no a aprecia cu polis a para e auto pa control. El a falta respet pa polis, pa cual motibo a deten’ mesora na e sitio mes. E cos no a bay facil.
E homber a resisti su detencion. Polis a bay tera cu ne. A logra pone na boei y pidi mas unidad bin duna un man. A hiba e sospechoso pa ward’i polis pa ey present’e dilanti un sub-fiscal.
E dama den e auto a yama tata di e hoben chauffeur. El a bay warda di Shaba mesora cu e mesun auto cu polis a para pa busca drechi di e yiu. Ora el a yega ainda polis tabata na otro warda unda un sub-fiscal a atende cu e proceso di detencion. Djey a trec’e ward’i polis na Shaba caminda a tene wanta y tambe pa e pasa den e proceso di interogacion.
