E sospechoso principal pa e tiramento di diabierna anochi na San Nicolas, ta tras den man di husticia. Ta for di diabierna anochi caba a duna indicacion di ken e por ta y den ki auto el a huy despues di a tira un homber tres biaha, horta su auto bay cu ne y pega su auto na candela na altura di santana di gobierno na Zeewijk. Tres dia despues a topa cu ne awe y a deten’e mesora, den compania di su pareha.
Awe mainta recherchenan a señala un auto cu un persona di interes pa husticia den dje. A sigui e auto riba un distancia mientras cu a pidi pa refuerso di entre otro patruya di polisnan uniforma. Na altura di Mariniers Kazerne, riba e caminda cu ta bay abou, a cera e auto cu diferente vehiculo policial, a baha tur hende for di auto y detene nan.
Segun un testigo cu tabata eybanda, tabata mustra mescos un escena di pelicula. E testigo a conta cu el a mira como 7 auto di polis y recherche, cu a cera e auto di tur banda. Mesora a detene 2 sospechoso, un mucha homber color scur y un mucha muhe hoben color bruin cu parce un indjan. E forma con e accion a bay, ta mustra cu ta considera e sospechosonan como peligroso, pensando cu nan ta “vuurwapen gevaarlijk”.
Polis a transporta ambos sospechoso pa ward’i polis pa continua cu e investigacion den nan contra. Ey lo presenta nan tur dos dilanti un Sub Fiscal pa dicidi riba nan detencion y posibel encarcelacion. Informacion cu nos a ricibi ta bisa cu ta sospecha e duo di tin di haber cu e tiramento cu a tuma luga diabierna anochi na Weg Fontein, unda a los tres tiro y despues pega e homber su auto na candela. Ta varios crimen pareu a tuma luga aki, pa cual e sospechosonan tin cuenta pa duna na husticia.
