Nan a test positivo, a isola nan y ta checknan diariamente. Con nan a contagia eyden no ta conoci ainda, asina Richard Kramers, hefe na Guarda nos Costa a anuncia awe. Ta trata di no menos cu 15 Venezolano cu status di ta indocumenta, cu ta kedando na Guarda nos Costa. Nan no por a biaha awe pa Venezuela pasobra nan ta contagia y e aerolinea no ta transporta nan bou di e condicionnan aki.
Manera ta conoci, riba 90 Venezolano a sali awe pa nan pais natal, tanto esunnan expulsa cu a caba di sinta un castigo di prizon, esunnan deporta cu a keda Aruba ilegalmente y esunnan cu pa un of oro motibo a fada y boluntariamente kier bay nan pais bek. Ainda tin un grupo grandi cu kier bay, pero ta depende di cuponan disponibel y ki dia Gobiernonan di Aruba y Venezuela ta acorda un di dos vuelo humanitario pa e pais bisiña.
Ta un hecho cu na momento cu Guarda nos Costa detene un stranhero pa motibo di no tin un status legal di sea estadia of di trabou riba nos isla, ta hib’e na e centro di detencion situa sea na Aeropuerto of na Huis van Bewaring na Dakota. Como cu Gobierno ta kita bo libertad for di Bo, ta e mesun Gobierno ta responsabel pa cuida bo, duna bo di come, di bebe, alohamiento y cuido medico si ta necesario. ‘
Den caso di e grupo aki di 15 indocumenta, ta responsabilidad di Guarda nos Costa awo pa brinda nan cuido medico, duna nan remedi y percura pa nan cura mas lihe posibel. Mescos cu tur otro hende, pa nan tambe DVG ta exigi pa nan keda 14 dia den isolacion. Pero como cu nan mester biaha pa un otro pais, nan si mester haci un test prome cu nan biaha y e test mester sali negativo, sino nan no por subi avion. Esey ta por lo menos un di e rekisitonan di Gobierno Venezolano pa acepta su mesun paisanonan bek.
