Diabierna anochi, den forma inespera, Team di Aresto di Cuerpo Policial Aruba a drenta e cas Weg Fontein # 98-A na San Nicolas. Parce nan tabata buscando un hende, pero a presenta sin un orden di Fiscal of Hues Comisario, a kibra porta, pone henter un famia plat abou, maltrata nan, incluyendo mucha y despues bay sin bisa ken nan ta busca, sin pidi despensa pa drenta cas robes y sin splica con a bira cu awo Polis por drenta cas di hende sin un apoderacion.
Despues cu 24ora.com, e website di pueblo, a expone e caso di drenta kibra cas robes na Kiviti, mesora e famia aki di Weg Fontein a yama nos cu nan tambe kier papia. Nan a pidi pa por expresa nan disgusto pa e locual nan ta considera “abuso di poder” of comiendo di un “politiestaat” na Aruba.
Geoffrey Maduro di Weg Fontein 98-A, cu den pasado a yega di cay den man di husticia na varios ocasion, no tabata ni na cas. E tabata algun cas mas eybanda cerca un primo cu tabatin “drive by babyshower” pa su pareha. El a mira e autonan di Arrestatie Team (AT) pasa berdad pero hamas e por a pensa cu ta na su cas nan tabata bayendo.
Despues un bisiña a yam’e bis’e cu Polis a drenta nan cas y a abusa. Nan a pone su tata, cu a haci operacion grandi, a bent’e na suela, a maltrata su yiu homber di 6 aña, un sobrino di 11 aña di edad, otro di 13 aña y dos amigo mas mayor di edad. A lastra nan na suela, trapanan na suela, etc. Nan no a bisa ken nan tabata buscando pero hopi lihe a ripara cu ta na cas robes nan a yega.
Ora a puntra nan pa un apoderacion pa drenta cas di hende, kibra porta y pone tur hende na suela, nan a contesta cu ta polis nan ta. A haci comosifuera cu como polis nan no mester un apoderacion pa haci tipo di inval asina, den cual cu forsa bruto ta comete “huisvrede breuk”.
Kisas nan mes no ta para keto na e impacto cu polisnan completamente bisti na preto, fuertemente arma, cu cara tapa y cu bos duro intimidante, ta causa den un cas di famia den cual tin ciudadanonan di edad avansa y mucha.
Segun Geoffrey Maduro, su yiu chikito di 6 aña desde diabierna ta yora di spanto. Anochi e kier drumi cu luz sendi, no kier ta su so den camber y marduga ta lanta bisa su mayornan cu e ta sinti hende canando den cas. Un trauma cu henter e famia mester biba cu ne awo debi na eror di polis.
Na momento cu Geoffrey a yega cas y a pone su mes na altura di locual a sosode, el a core bay ward’i polis na San Nicolas y puntra nan si t’e nan ta buscando. A bisa cu nan no sa di nada y no tin un ordo di detencion riba su nomber. Awe a bay Ministerio Publico pa puntra kico ta pasando y si nan ta buscand’e of ta cas robes nan a drenta y ken lo cubri pa drecha e daño cometi na su propiedad. Ningun hende por a responde y a ked’i yama bek pero nada ainda.
Famia Maduro ta reclama cu husticia a kibra nan trankilidad y nan paz den cas. Nan ta keha polis di a bin nan cas sin un ordo di Fiscal of Hues Comisario pa drenta paden cu forsa, kibra porta y puntando laser di arma pisa riba su yiunan. Na Kiviti sikiera polis a haci fout y a bin cu e apoderacion un ora despues. Aki di diabierna nan no a bin nunca mas cu e supuesto apoderacion cu nan lo mester tabatin pa por a drenta kibra su cas.
Entretanto polis a detene varios sospechoso caba den e dos casonan di tiramento. Parce ta atraco e hobennan kier a bay tira y como cu e victimanan a resisti, a tira nan cu arma di candela. “Pero ami no ta den e cosnan ey mas, mi’n conoce e muchanan ey, no tin pakico bin spanta y abusa di mi famia den nos cas. Si ta di mi nan mester, djis yamami mi mes ta bin ward’i polis entrega su mes”, di acuerdo cu Geoffrey Maduro.
