Na inicio di e parada, Stichting Maneho di Aruba su Carnaval (SMAC) a anuncia cu ta dedica e parada grandi di San Nicolas na Benedicto “Boy” Nicolaas. A invit’e pa cana hunto cu SMAC durante e parada.
Motibo di e honor ta pa tur su dedicacion pa yuda organisa y coordina paradanan di Carnaval pa 47 aña largo, tempo di SAC. Es mas, awe Boy Nicolaas ta cana bisti cu su uniform di SAC den parada.
Locual sigur ta un momento masha emocional y historico, ta e echo cu Boy Nicolas ta welo di Edelysse Nicolaas, cu pa e ultimo dos añanan ta secretario di SMAC y, mescos cu su welo, awo tambe ta yuda dirigi paradanan di carnaval. Pa e nieta ta un honor di a sigui den pasonan di su welo stima.
Parada a start pa exactamente 10:00 am. Darren van Ommeren, presidente di SMAC a anuncia di diabierna caba cu nan ta convenci cu e parada ta asina grandi awe cu e cabes lo topa cu e rabo. A prepara un plan di contingencia pa maneha e situacion aki.
Esaki ta di dies aña cu SMAC ta organisa Carnaval di Aruba.
