Diahuebs mainta tabatin sentencia den e caso penal contra e waiter di nacionalidad Dominicano, esta Gender Severino Hernandez di 44 aña di edad. Husticia na Aruba a acus’e di tabata forma parti di un organisacion criminal cu ta “clone” credit card. Corte a hay’e culpabel!
Tres siman pasa corte a trata e caso penal aki pa e delito cu ta mas conoci como skimming. Ultimo añanan diferente caso similar a bini dilanti y mayoria biaha esunnan envolvi ta di nacionalidad Bulgaro. E biaha aki esnan envolvi tabata Latino cu a haci esaki cu ayudo di un Dominicano biba na Aruba, igual cu e caso di e Bulgaronan.
Lesamento di e sentencia a bay hopi rapido door cu e tabata cortico y no tabata e mesun hues cu a trata e caso a haci esaki. Tampoco e abogado tabata presente pero si dos famia di e acusado.
E hues cu a trata e caso a haya e homber culpabel di e delito cu ta acus’e di dje. A tene cuenta cu ta trata di un “first offender”. Esta prome biaha cu e ta haya su mes envolvi cu husticia. El a haya un castigo conforme exigencia di fiscal, pero cu un parti condicional
Hues a bisa cu e ta haya e exigencia di fiscal na su luga pero teniendo cuenta cu Hernandez ta “first offender”, a conden’e na 3 aña di prizon di cual 6 luna ta condicional cu 2 aña di prueba. Severino a keda basta afecta pa e sentencia aki, cu el a kere probablemente ta mas abou. Pero hues a splica cu loke el a haci a causa daño na turismo di Aruba. Y mas pasobra no ta un desconoci, sino un hende cu a atende cu e bishitantenan aki cu a confia cu uzando nan credit card na Aruba, nada di esaki lo pasa cu nan.
E delito cu Severino a comete tabata entre e periodo di juli 2021 pa september 2022. Tabata un compania di credit card Mericano cu a bati alarma na autoridad local cu hopi cliente di nan a bisa cu nan a haya gasto riba nan carchi cu nan no a haci. Asina a cuminsa e investigacion cu a conduci na e acusado aki cu tabata envolvi den hortamento di casi 185 mil dollar for di e creditcardnan falsifica.
Ora a haci inval na su cas a bin topa cu un aparato di skimming pega na su laptop, pero cu e ta bisa cu nunca el a uza. El a simplemente saca potret di e creditcardnan cu e clientenan tabata dun’e pa swipe. Asina a bin haya den su celular 1385 potret di creditcard. E ta bisa cu el a haya rond di 3 mil dollar pero e mes a declara tambe cu pa cada potret e tabata haya 20 dollar cu lo nifica cu mas bien el a haya rond di 30 mil dollar.
E tabata traha na Hotel lowrise. Ora cu e clientenan dun’e nan carchi pa paga, e ta saca potret y mand’e pa esnan cu ta clone e carchinan aki. E suma di casi 186 mil dollar tabata di un solo tarheta di credito Mericano y cu a wordo uza via di 20 di e carchinan aki. Solamente un compania di creditcard a haci denuncia, pero tabatin mas.
Den e declaracionnan cu el a duna e ta papia di Alex y Diego kende ta esnan cu a fors’e ora cu e kier a hala atras, bou di menasa. Un storia cu fiscal ni hues a kere mucho. No ta conoci si e acusado aki tin propiedad, pero Ministerio Publico lo cuminsa un ontnemingszaak contra e homber aki, pa purba recobra e suma cu el a horta di turista.
