Luna di december a habri Aruba cu inkietud y malcontento bou di e sindicatonan. Manera ta conoci, pa algun siman caba nan ta boga pa elimina e 12.6% cu nan ta entregando di nan salario ya for di inicio di pandemia. Segun a splica nan, esaki tabata pa solidaridad y pa por financia fase y loonsubsidie. Sinembargo, recientemente a informa cu lo para ambos, pero ainda nan mester entrega e 12.6% di nan salario. Reaccion riba esaki tabata uno di disgusto ya cu nan no por compronde dicon nan tin cu kega entrega mas ainda.
Segun e presidente di SIMAR Josephine Albertus a bisa, dia 25 di november ultimo nan a entrega un manifiesto pa gobierno elimina e recorte di 12.6% y nan ta keda para pa esaki. Awe mainta a tene un reunion cu e gruponan di sindicato cu a firma esaki pa asina trata e carta ricibi pa gobierno diabierna ultimo cu un contesta riba e manifiesto. Albertus a splica cu locual a manda den carta no ta cuadra y no ta realistico. Segun Albertus, den e carta a menciona e 60% y incertidumbre di trabou siendo cu, segun Albertus, entregando 12.6% no lo elimina esakinan.
Den tur esaki, a haci un yamada pa un dia nacional di accion dia 8 di december binidero pa 7:30 am te cu 9:00 am na oficina di SIMAR pa mustra cu nan ta keda para riba e hecho cu gobierno mester bay elimina e recorte di 12.6%. A enfatisa cu tur sindicato lo bay mustra nan malcontento cu e decision di gobierno pa keda cu e recorte y cada sindicato lo bay haci esaki den nan mes manera.
Pa cobertura mas amplio lesa edicion di TREMPAN mañan.
