Brandweer di Aruba tin trucknan di añanan 96/97 y nan ta den un situacion hopi deplorabel, pasobra nan no ta di confia riba caminda. Sindicato SIMBA a sinta cu Minister di Husticia, Andin Bikker, pasobra nan no por mas.
E sindicato a ricibi un video for miembronan mustrando cu a dura 5 minuut pa start e truck. Durante un asistencia cu nan mester a bay pa un auto cu tabata kimando, e truck na aeropuerto no por a yega di biaha pasobra a dura 6 minuut pa yen’e cu aire.
No solamente e trucknan ta problema, pero e edificionan ta den un situacion malisimo, segun David Roza, presidente di Sindicato Simba. Na e post di San Nicolas tin blafon cu ta cayendo y edificio tin schimmel. A sinta cu minister y bisa cu por ehempel no tin television na aeropuerto, pasobra nan kier mira kico ta pasando y no por haci esey. Nan tin stoelnan cu ta bin di tempo di John F. Kennedy, di cual ex colega Roy Tromp a laga nan atras.
No tin e sistema di perslucht nobo, cu ta un sistema di tanki cu bomberonan ta bisti pa bay candela di cas of auto, pasobra esun cu tin no ta gekeurd mas. Segun comandante di bombero, a habri nan y controla y nan ta bon pero esakinan no ta apto mas pa traha. E ultimo cu nan a ricibi tabata na 2015 cu ex colega a zorg pa esaki pero desde e tempo ey no a haya mas. Brandweer ta bringando pa haya esaki y segun minister ta mira con pa haya e placa. Desde aña pasa bomberonan tin cu haci uzo di insecticida, esta pifpaf of baygon, pa start motor di e trucknan. E bomberonan ta core bay supermercado pa cumpra un insectisida, drenta bou di truck y spuit esaki pa start e motor.
E sindicato a sinta cu Parlamento di Aruba, purbando di yega na Gobernador p’e situacion aki. Segun Roza, presidente di Parlamento a bisa nan pa traha un lista di cosnan cu mester pa mira kico tur cos lo costa. Asina aki nan lo bringa pa haya e fondo pa yuda minister di Husticia mas pronto posibel. A yega na acuerdo cu e sindicato SIMBA y e staff sinta hunto pa asina cuminsa traha riba e lista pa haya e cosnan mas pronto posibel.
Brandweer a haya e trucknan tempo di defunto minister Watty Vos y den añanan despues te cu awo, nan a bay diferente biaha den welga pasobra materialwagen ta paga cu nan ora di bay asistencia. El a sigui bisa cu nan mester a wanta maltrato vocal for di hendenan. Nan a welga y lucha pa por a haya 1 materialwagen nobo y 2 auto spuit, esta rosenbauer. A lucha na 2011 di cual e materialwagen a yega na 2012 pero e autonan ey tambe a haya un mula y ta den un situacion cu ta bayendo atras. E trucknan mester di mantencion, pasobra cosnan ta kibra. Tur esaki ta bin door di maneho cu no ta bon. Segun Roza, si e maneho tabata bon, no lo tabatin e situacion aki sino cosnan chikito.
Un otro problema cu nan tin cu e trucknan ta cu esakinan no ta brake. Roza a bisa cu e por a logra downshift pa stop, pero e trucknan nobo ta electronico y ta primi un boton. No por downshift y si por ehempel dal un persona mata, bin investigacion, y mustra brake no ta bon, e tin chens di cay cera. Aunke cu dienst ta bisa cu nan ta carg’e, pero riba ley publico nan no por carga nada, segun e presidente di SIMBA.
E sindicato a trece e puntonan aki desde aña pasa november na minister di Husticia, unda cu nan a papia cu Minister Presidente, Parlamento y diferente caminda. E sindicato ta buscando unda nan por haya yudansa pa Brandweer, acercando Banco Central y AHATA. For di Brandweer nan no a haya peticion, pero e sindicato ta batiendo na portanan desespera pa yuda cu e siguridad pa hendenan di Aruba y bomberonan mes. Aworaki Brandweer tin 3 auto di spuit pa Aruba, pa asina por paga candela cu tin. Segun Roza, e trucknan ta 95% den mal estado pa ora nan ta riba e careteranan di Aruba, hasta trapi ta mara cu cabuya. E sindicato kier sa kico Minister di Husticia ta bay haci pa evita cu e cosnan aki no sigui pasa, cual minister a bisa di ta trahando riba e situacion aki.
