Pa 2 of 3 siman Ryan Ridderstaat y Iran Grigory di Island Taste a acerca Humberto de Castro pa hunto brainstorm kico por haci pa duna un tipo di asistencia y/of yudansa na famianan di San Nicolas cu ta den necesidad.
Nan a yega na e conclusion cu e asistencia por duna ta crea pakete di alimentacion, cuminda, pa famianan den necesidad.
E grupo aki a yega cu e recursonan hunto y a haci un donacion di mas o menos 30 saco di cuminda, segun Humberto de Castro. A haci esaki bou di guia y cooperacion di Janine Rodriguez. Nan ta agradecido pa su asistencia di guia den e proceso aki.
Segun de Castro, e meta principal no ta solamente duna e famianan den necesidad asistencia pero haci esaki mas grandi. Kier haci e proyecto mas grandi continuando cu e meta semanal. “Cu tur siman of cada 2 siman cu un compania of persona ta haci donacion na un famia na San Nicolas,” el a sigui bisa. Pa atrai y haci e proyecto mas atractivo pero tambe hasta motiva algun compania, nan kier uza e strategia di reta otro socialmente.
El a sigui bisa, sea ta reta otro den push up, reta otro pa un baile, nan kier tuma e oportunidad di reta e compania Project Management and Engineering Consultancy (PMEC) di San Nicolas, pa ta e proximo compania pa haci e donacion sea otro siman of aki 2 siman. E meta ta pa iguala of surpasa e donacion di e grupo. Nan ta gradici tur cu a yuda pa haci e donacion aki uno posibel.
