Dos scol a haya nan mes cu reto di COVID-19, pasobra klasnan mester a bay bou cuarentena. E situacion aki tabata pa motibo sea docente of alumnonan a contagia cu Coronavirus.
Den fin di siman sindicato SIMAR a haya sa cu tin caso di COVID na scolnan basico Beatrix y St. Anna, pero a bin acerca un otro scol. Un alumno a sali positivo y di biaha e scol a tuma precausion. Segun Josephine Albertus, presidente di SIMAR, e scol a informa henter klas pa no presenta, pero a decontamina henter scol. Muchanan di klas 1 y 2 por a presenta na scol, pero a laga e muchanan di klas 4 cu tabatin e mucha positivo keda cas pa dos siman.
Siman pasa tabatin contacto di COVID-19 na Conrado Coronel y a cera henter scol, pero e biaha aki esey no tabata e caso. SIMAR a splica cu nada cambia, pero awo ta analisa e situacion. Siman pasa dialuna nan a sinta den e crisis overleg cu directiva di scol, a splica den caso di un maestro of alumno, e maestro ta informa e cabesante. E cabesante ta percura pa duna e informacion na directiva di scol y tuma contact cu Jeugd Gezondheidzorg (JGZ), DVG y cluster 4. Nan ta bay mira si e contagio na scol ta di un persona so, si ta un cluster y nan ta evalua e situacion. Nan ta dicidi si ta cera henter scol, si ta cera e klas so, docente of alumno so.
Emmaschool a habri su porta awe, pero no ta tur scol ta tuma contacto cu SIMAR. Si maestronan tin un preocupacion, nan ta tuma contacto cu e sindicato pero di otro banda nan tambe ta haya informacion via rednan social. SIMAR ta di pensamento cu ta importante pa scolnan sigui protocolnan. Durante reunionnan di overleg cu directiva di scol y crisis team, SIMAR ta presente. Albertus a sigui bisa cu nan ta na altura di e cambionan y ora cu haya yamada di maestro preocupa, por splic’e con e procedura ta.
E parti mas importante cu SIMAR ta haya, ta e meta pa percura y garantisa bienestar, salud y siguridad di tanto alumno como maestro. Pa por haci esey maestro y alumno tin di cumpli cu e protocolnan. Probablemente e contagio no tabata na scol, el a bisa. Door di tin scol cu aglomeracion, tin hopi alumno y maestro riba otro, ta hopi importante pa cumpli cu e protocol. SIMAR ta keda vocifera pa cumpli cu esaki, pero tambe si ripara cu na scol no por cumpli cu ne, e docente tin di vocifera esaki. “Si no bisa nada, tur hende ta kere cu ta cumpli e protocol,” el a bisa. En caso docentenan ripara cu algo no ta bay bon na scol, nan tin cu bisa pasobra cosnan lo sigui cana na un manera malo.
